!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Хронологија: Како се смени власта во Македонија


Скопје, 1 јуни, 2017 - 10:00 (META) 

Трите години политичка криза за граѓаните на Македонија беа тешки, исцрпувачки и стресни. Кризата не беше само политичка, таа премина и во економска, социјална, морална и етичка. Имаше серија протести и контрапротести, судења и контрасудења, истраги и контраистраги. Потпишан беше Договорот од Пржино, па потоа и Пржино 2. Имаше избори, но и одложени избори, се појавија прислушувани материјали, но и обвиненија дека тие се „лепени, сечени и монтирани“. Народот се подели на патриоти и на предавници – сето тоа филувано со меѓусебни обвинувања, лажни вести и со засилена пропаганда.

Промените почнаа со граѓанското будење што на улиците го пренесоа студентите кои организираа три масовни протести, а продолжија преку „бомбите“, формирањето на СЈО и неговите истраги кои ги презентираа трите обвинителки.

Аболицијата потпишана од претседателот Ѓорге Иванов доведе до три месеци секојдневни протести на кои се роди „Шарена револуција“. Предвремените парламентарни избори беа одложени двапати, а изборот за претседател на Собранието го следеше насилен упад во законодавниот дом, при што беа повредени неколку пратеници, граѓани и новинари. По серија посети на меѓународни посредници, Иванов сепак му го додели мандатот на Зоран Заев, а тоа доведе до избор на нова влада. По 11 години, претставниците на ВМРО-ДПМНЕ седнаа во опозициските клупи, а СДСМ стана власт на чело со премиерот Заев.


Визуелна хронологија: Еден месец протести против аболицијата


Скопје, 12 мај, 2016 - 16:50 (META) 

Точно еден месец помина (12 април) откако претседателот на државата, Ѓорге Иванов, прогласи широка аболиција и помилува 56 лица – политичари и нивни соработници кои се споменуваат во прислушуваните разговори.

Таа одлука, донесена пет дена по распуштањето на Собранието, предизвика бура протести низ целата земја и на сите нивоа. Секој ден се бараше и се бара повлекување на одлуката и оставка на претседателот. Протестите од Скопје се проширија низ целата земја, а демонстрантите од т.н. „Шарена револуција“ на иновативен начин и со „герила-акции“ продолжуваат да го изразуваат револтот и да ја исмеваат одлуката за помилување.

Иванов, со потегот без преседан, дополнително и максимално ја искомплицира кризата која трае повеќе од една година.

Секојдневните протести низ земјата продолжуваат.