!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

На Мундијалот во 2026 година ќе играат 48 репрезентации, одлучи ФИФА


Цирих, 10 јануари, 2017 - 12:20 (META) 

Светската фудбалска федерација (ФИФА) денеска едногласно одлучи Светското фудбалско првенство да биде проширено и на него да учествуваат 48 репрезентации.

По Светските првенства во Русија во 2018 година и во Катар во 2022 година, на следниот Мундијал во 2026 година, чиј домаќин сè уште не одреден, ќе играат рекорден број репрезентации.

Според усвоениот формат, почетната фаза од Светското првенство ќе брои 16 групи со три репрезентации, а во елиминационата ќе играат 32 национални тимови, кои ќе бидат најдобри во групите. Со новиот формат ќе биде зголем бројот на натпревари на 80, наместо досегашните 64. Сепак, шампионскиот тим, како и досега, ќе треба да одигра седум натпревари за да стигне до титулата.

Турнирот ќе трае, како досега, 32 дена. Траењето на турнирот останува непроменето поради барањата на големите европски клубови, кои реагирале на реформите поради густиот распоред на клупски натпревари.

Инаку, станува збор за прво проширување на Светското првенство во фудбал по она во 1998 година, кога на Мундијалот во Франција настапија 32 репрезентации, колку што ќе играат и на СП во Русија во 2018 и во Катар во 2022 година.

Претходно, од 1954 до 1982 година, на светските првенства учествуваа 16 репрезентации, а од 1986 до 1994 година играа 24 национални селекции.


Швајцарското обвинителство отвори истрага против Франц Бекенбауер за корупција


Берн, 1 септември, 2016 - 17:23 (META) 

Швајцарското обвинителство отвори криминалистичка истрага против германската фудбалска легенда Франц Бекенбауер и уште три други лица во врска со кандидатурата на Германија за организирање на Светското првенство во фудбал во 2006 година, јавува „Би-би-си“.

Тие, како членови на организацискиот комитет за првенството, се осомничени за измама, малверзации, перење пари и за проневера.

Некои од делата за кои се товарат, како што пишува „Би-би-си“, биле извршени на територијата на Швајцарија.

Бекенбауер, кој ја предводеше кандидатурата на Германија за Светското првенство во 2006 година, претходно ги отфрли наводите за корупција.

Во март оваа година, Светската фудбалска организација (ФИФА) почна истрага против шест лица за нивната улога во доделувањето на организацијата на превенството на Германија во 2006 година.