Германската влада повика политичките сили во двете земји да ја поддржат спогодбата


Берлин, 18 јуни, 2018 - 16:35 (META) 

Германската Влада ја поздрави спогодбата помеѓу Атина и Скопје и апелира политичките сили од двете земји да ја поддржат. Според портпаролот на германската Влада, Штефан Зајберт, спогодбата дава доза оптимизам, но загриженост предизвикуваат насилствата за време на протестите во Скопје против договорот, пренесува АНА-МПА.

За германската Влада, спогодбата е важен чекор напред за двете земји и затоа не треба да се инсистира на национализам, туку сите политички чинители треба да ја поддржат.

– Спогодбата може да ги тргне пречките за прекугранична соработка, раст на трговијата и инфраструктурата, и да придонесе за регионалната стабилност. Убедени сме дека, ако некои кусогледо инсистираат на националистички позиции, тие им штетат на спогодбата и на многу луѓе во регионот што сакаат стабилност и економски просперитет. Премиерите на двете држави го направија можен овој важен компромис, што може да стави крај на проблемот кој траеше со децении. Германската Влада ги повикува сите партии и политички сили во двете земји да го поддржат овој договор – порача Зајберт.


Ципрас: Не можеме да им забраниме да се самоопределуваат како Македонци


Атина, 14 јуни, 2018 - 9:33 (META) 

Грчкиот премиер Алексис Ципрас во интервју за грчката државна телевизија ЕРТ вчера порача дека со новата спогодба, Грција не може да го забрани правото на жителите на Република Македонија да се самоопределуваат, јави дописничката на МИА од Атина.

– Во договорот постои решение за државјанството, бидејќи не можеме да им го забраниме правото на соседите да се самоопределуваат како Македонци. Овој договор не го потценува правото на самоопределување, тоа не можеме да го направиме. Не можеме да им забраниме да се самоопределуваат како Македонци – рече грчкиот премиер и објасни дека во договорот терминот „Македонци“ не се однесува на историјата на грчката Македонија.

Ципрас потенцираше дека опозициите во двете земји имаат идентични позиции, дури и изјавите им биле исти, додека, пак, во однос на ставот на коалицискиот партнер во грчката влада, Ципрас рече дека Панос Каменос го известил дека ќе си го задржи почетниот став и нема да гласа за договорот, но и дека нема да ја урне владата.


Римокатоличкиот Апостолски егзархат стана бискупија без „Македонија“ во името


Скопје, 31 мај, 2018 - 17:19 (META) 

Папата Франциско го воздигнал во бискупија под наслов „Успение на Пресвета Богородица во Струмица – Скопје“ досегашниот Апостолски егзархат во Македонија, воспоставен во 2001 година, јави МИА.

Веста за чинот на воздигнувањето е објавена денеска напладне во Ватикан, како и во Македонија од апостолскиот нунциј, монсињор Анселмо Гвидо Пекорари.

Во името на бискупијата, за разлика од досегашниот егзархат, го нема зборот „Македонија“. Егзархатот ги опфаќаше католиците од источен обред, потомци на Унијатите, а паралелно со него е и Скопската бискупија, за католиците од западен обред.

За прв бискуп на новооснованата бискупија е именуван досегашниот скопски бискуп, Киро Стојанов.


Лидерска средба за името денеска во 13 часот


Скопје, 19 мај, 2018 - 11:26 (META) 

Премиерот Зоран Заев за денеска во 13 часот во Клубот на пратеници во Скопје најави дека ќе се одржи лидерска средба на која тој ќе информира за преговорите за спорот за името и неговата средба со грчкиот премиер Алексис Ципрас во Софија.

На средбата, како што рече, очекува да се изгради консензус за ова прашање.

На средбата во Клубот на пратениците се поканети претседателот Иванов, претседателот на Собранието Џфаери, претседателот на ВМРО ДПМНЕ Мицкоски и претседателот на ДУИ Ахмети.

Премиерот Заев не сакаше да го коментира најновиот предлог за решавање на спорот за името, за да се даде шанса да успее преговарачкиот процес.

Присуството на средбата го потврди македонскиот претседател Ѓорге Иванов, од чиј кабинет вчера соопштија дека тој ја прифатил поканата на премиерот Зоран Заев за лидерската средба.

Иванов на средбата очекува да биде информиран за суштината и за деталите од разговорите во процесот за надминување на разликата околу името, истакнаа вчера од кабинетот на претседателот.

И лидерот на ВМРО-ДПМНЕ Христијан Мицкоски синоќа во изјава за медиумите потврди дека ќе учествува на средбата и истакна оти ставот по однос на евентуален договор партијата ќе го каже по нејзиното завршување, откако ќе ги има сите информации.

Денеска и грчкиот премиер Алексис Ципрас во претседателската палата во Атина ќе го извести претседателот Прокопис Павлопулос за текот на преговорите околу името.

Последниот предлог за решавање на спорот за името е „Република Илинденска Македонија“, кој наводно бил прифатен и од грчкиот премиер Ципрас.

Средбата доаѓа по вчерашните разговори на Заев со неговиот грчки колега Алексис Ципрас во Софија, по која Заев изјави дека е утврдена една опција што е прифатлива за двете страни, но дека за неа прво треба да се консултираат со сите релевантни фактори во своите земји.


Заев: Можно решение за името при отворањето на Уставот за влез во ЕУ


Скопје, 29 април, 2018 - 12:25 (META) 

Премиерот Зоран Заев смета дека е можно конечното решение на спорот со Грција околу нашето име да биде врзано влезот на Македонија во ЕУ.

– Можеби конечното решение ќе биде врзано со гласањето на Македонија, како граѓани, со давањето на нашиот суверенитет на ЕУ, во која сакаме да бидеме членка и тогаш се отвара и Уставот, можеби и тука е решението, поради тоа што знаете дека Грција бара и промена на Уставот, заради промената на уставното име. Јас сум убеден дека креативноста ќе ги изнајде овие решенија, вели Заев, во интервју за Радио Слободна Европа.

Тој прецизира што останува како нерешено прашање во преговорите, поради, како што вели, сензитивноста на прашањето, но истакнува дека за се што се преговара, е всушност условено и дека ако нема конечно решение, ништо од досега договореното нема да важи.

Во однос на информациите дека всушност опсегот на употребата на новото име е она на што сега се фокусирани преговорите, Заев објаснува која е всушност пречката.

– Сега ерга омнес се појави дополнително и за внатрешна употреба, но се работи за политичко прашање. Зошто политичко? Затоа што двете страни мора да изнајдат решение коешто е взаемно прифатливо, за да помине низ институциите на двете земји. На крајот Зоран Заев и Алексис Ципрас можат да подадат рака, да постигнат договор, Никос Коѕијас и Никола Димитров исто така, но институциите се тие коишто го носат конечниот став и одлуките, така и граѓаните на двете земји. Затоа мораме да водиме грижа и да бидеме креативни во изнаоѓање на решение, кое ќе ги задоволи барем минималните потреби на двете земји, а тоа е да има достоинствено решение и да се сочува идентитетот на двете земји со заемно разбирање и почит, вели Заев.

По јасниот руски став, пренесен преку рускиот амбасадор во земјава, на прашањето што Русија може да направи во однос на нашето членство во НАТО, Заев е уверен дека Москва не може ништо да направи за да го спречи тоа.

– Тие имаат свои ставови. Македонија е мала земја која е пријател со Руската федерација и која сака да биде пријател. Нашето членство во НАТО не е да напаѓаме, туку да го сочуваме мирот, а тоа значи стабилност и во економска смисла, вели Заев.

Во однос на економската состојба и прогнозите на експертите дека за економски напредок на земјата потребен е раст од 5% , Заев признава дека тие се во право, и дека е оптимист оти Македонија годинава ќе ја заврши со раст од 4%, наместо прогнозите на хартија од 3,2%.

Прашан за изборното ветување дека на портата Македонија ќe биде поставен бројчаник кој ќе ги покажува украдените пари од претходната власт, Заев вели дека тоа ќе го оствари, но мора да има правослини пресуди за осомничените.

– За да може некој да ги врати украдените пари и да се конфискува имот мора да има правосилна пресуда, по што почнува постапката за враќање на украдени пари, имот, на обештетување на државата. Јас тогаш реков, бидејќи државата нема пари, јас приватно ќе поставам еден бројчаник кој чини околу 5-6 илајди евра, веќе проверив. Тоа не е заради суета, туку да остане спомен за следните генерации дека тој што ќе украде од државата ќе биде фатен и ќе треба да ги врати украдените пари, вели Заев во интервјуто за РСЕ.


Нимиц, Димитров и Коѕиас денеска се среќаваат во Виена


Скопје, 25 април, 2018 - 9:36 (META) 

Министрите за надворешни работи на Македонија и на Грција, Никола Димитров и Никос Коѕиас денеска во Виена ќе се сретнат со Метју Нимиц, посредникот во преговорите за името под покровителство на ОН.

Како што соопштија од седиштето на ОН во Њујорк, Нимиц ќе им „асистира на двете страни во изнаоѓање заедничко прифатливо решение за прашањето со името“.

Иако вчера еврокомесарот Јоханес Хан изрази оптимизам дека во следните две седмици може да се реши проблемот со името, премиерот Зоран Заев рече дека посакува, но не верува дека спорот со Грција ќе биде решен за две недели.

По изјавата на Хан реагираше и официјална Атина. Грчкото министерство за надворешни работи преку соопштение го повика еврокомесарот да престане да дава погрешна слика за преговорите, оти не ги разбира, а со такви изјави и ги поткопува.


Воена база во Македонија побарал Ердоган од Заев, тврди Теодоракис


Атина, 22 март, 2018 - 14:17 (META) 

Лидерот на центристичката, социјално-либерална грчка партија Река, Ставрос Теодоракис, во емисијата „Сега“ на грчки „Скај“ изјави дека „Таип Ердоган му побарал на Зоран Заев да Турција отвори воена база“ како контра услуга за поддршката и помошта што земјата би ѝ ја давала на Македонија, пренесува десничарскиот грчки „Елефтерос типос“.

И Грција и Турција се членки на НАТО, но постојано се во судир околу поморската граница во Егејот и кипарското прашање.

– Ќе дозволиме ли да се формира турска воена база на нашата северна граница и толку близу до Солун – запрашал Теодоракис, чија партија има шест пратеници во грчкиот парламент и двајца во Европарламентот.

Теодоракис ова го кажал во контекст на преговорите за името и како поткрепа на заложбата дека проблемот треба што поскоро да се реши.

Тој неодамна имаше средба со премиерот Ципрас на која разговараа за потребата од формирање Совет за национална безбедност.

Сложено име за севкупна употреба, но и бришење на „агресивниот дух кон Грците“ од Уставот, учебниците и секојдневниот живот во соседната земја, се позициите на Теодоракис за прашањето за името.

– Едно сложено име за севкупна употреба, паралелно со конкретни обврски од нашите соседи дека ќе има бришење во нивниот Устав и во учебниците. Многу инсистирам на учебниците затоа што тие ја градат свеста, дека од нивното секојдневие, од нивната култура, ќе се избрише овој агресивен дух кон Грците и кон грчката Македонија – вели Теодоракис за „Скај“.

Лидерот на „Река“ одби директно да одговори каква ќе биде позицијата доколку договорот дојде во грчкиот Парламент.

Гласањето, според него, ќе зависи од самиот предлог и што тој точно ќе содржи.


Заев: Недозволиви се закани, омаловажувања и сеење страв пред домовите на пратениците


Скопје, 19 март, 2018 - 11:53 (META) 

Премиерот Зоран Заев смета дека со протестите што се организираат пред домовите на пратениците се вршат неколку кривични дела и тој лично ќе ги заштити нивните деца, врз кои демонстрантите сеат страв и терор. Заев ова го изјави пред Основниот суд Скопје 1, по одржувањето на денешното рочиште за случајот „Поткуп“.

– Протестите се уставно право, дозволиво е протестирање на граѓаните и тоа е нешто што треба да се ползува. Сепак, она што се прави пред домовите и пред дечињата на пратениците, пред членовите на нивните семејства и родители е апсолутно недозволиво, зашто е кршење на приватноста на домот, се упатуваат директни закани, омаловажување и целосно сеење страв и трепет кај дечињата. Јас лично ќе ги заштитам дечињата на пратениците – рече Заев и посочи дека Министерството за внатрешни работи презема дејствија.

Во врска со преговорите за името, Заев е оптимист и верува во решение до летото.

– Верувам дека е можно да се најде решение и оптимист сум ако притоа водиме сметка за достоинството и за идентитетот. Мене ми е важно како тоа ќе го прими грчката јавност и дали ќе биде прифатливо  низ нивните институции. Верувам дека и на грчките политичари и на премиерот Ципрас треба да им биде важно како тоа ќе биде прифатено овде од граѓаните на Македонија, но и како ќе помине низ институциите на системот – изјави Заев, одговарајќи на новинарско прашање.

Тој вели дека ги информира претседателот на државата и опозицијата за текот на преговорите кога смета дека има потреба за тоа.


Коѕиас ѝ го претставил подновениот договор на владата, следната недела слетува во Скопје


Атина, 8 март, 2018 - 10:51 (META) 

Според грчките медиуми, шефот на дипломатијата Коѕиас, на вонредна владина седница ја преставил грчката верзија на нацрт-договорот околу проблемот со името, во кој наводно, се додаден и нови елементи.

Според последните информации, можно е Коѕиас со документот да допатува во Скопје кон средината на следната недела.

За сега, наспроти минатите искуства, содржината на договорот, се држи во тајност и далеку од медиумите.

Грчката страна по секоај цена сака да одбегне содржината на документот да протече и „дипломатските консултации да ги врши преку насловните страници на весниците“.

Премиерот Алексис Ципрас во последно време води политички битки на многу полиња, а оваа околу името е една од најсериозните.

Ципрас и покрај тоа тврди дека е решителен да го затвори проблемот, вели весникот „ИЕфимерида“.

Се очекува Коѕиас договорот прво да му го презентира на неговиот македонски колега, Никола Димитров.

Главната пречка, сепак, според Атина, е нивното инсистирање на промената на уставот, за што засега нема согласност од македонска страна.


Грците незадоволни дека Меркел го нарекла Заев „македонски премиер“


Атина, 21 февруари, 2018 - 16:35 (META) 

Грчките медиуми средбата Меркел – Заев денеска во Берлин ја забележаа главно по изјавата на канцеларката дека има посилна енергија во преговорите, но и по тоа дека Меркел го поздравила гостинот со зборовите „му посакувам добредојде на македонскиот премиер“.

Електронското издание на весникот „Прото тема“ токму оваа изјава на Меркел ја вади во наслов.

Инаку, прашана од македонски новинар, Меркел рече дека не сака многу да зборува за преговорите за името и за некакви притисоци. Сепак, го нагласи фактот дека првпат по подолго време има посилна енергија во преговорите.

– Мојот став е дека притисокот во преговорите не е многу од корист. Имам впечаток после подолго време дека двете страни имаат решеност за преговарање. Верувам дека и вие знаете дека јавните изјави некогаш повеќе може да штетат отколку да користат. Тука треба да се најде патот, не треба на прес-конференција, туку зад затворени врати – рече германската канцеларка.