Балкански барометар 2018: Регионот врви кон подобро, Македонија полека го следи


Скопје, 6 јули, 2018 - 12:20 (META) 

Задоволството во животот генерално се зголемува во регионот на Балканот, без членките на ЕУ, а загриженостите полека опаѓаат, се вели во најновото издание, за 2018, на Балканскиот барометар на Регионалниот совет за соработка (РСС).

Изданието ги пренесува наодите од повеќе анкети, кои за  РСС се спроведени од ГфК на крајот на минатата година, со над 6.000 граѓани од Балканот и 1.200 компании.

Генералното задоволство од животот се подобрува и сега изнесува 42 отсто, наспроти 35 отсто во 2015 година, што пак значи и пораст на оптимизмот за годините што следуваат. Во Македонија од 1.005 испитаници, 20 отсто рекле дека се целосно незадоволни од својот живот, главно незадоволни се 29 отсто, 34 отсто се изразиле како ниту незадоволни, ниту задоволни, додека 17 отсто рекле дека се главно задоволни од животот, а само 1 отсто се целосно задоволни. Ниту еден од 1.005 испитаници во Македонија не одбил да даде одговор ниту пак немал став.

Кај бизнис секторот на Балканот, 62 отсто позитивно се изразиле за сегашната ситуација и перспективите, што е голем пораст од 2015 година, кога со такво генерално расположение биле 47 отсто од фирмите.

Загриженоста кај населението во регионот во поглед на невработеноста е 61 отсто, за разлика од резултатите минатата година, кога таа биле 66 отсто. Загриженоста за економската ситуација изнесува 46 отсто, за разлика од 48 отсто лани. Следна на листата е корупцијата, кога сега е причина за загриженост кај 29 отсто од испитаниците, за разлика од 32 отсто во 2017 година. Криминалот предизвикува загриженост кај 16 отсто од луѓето, што е еден процент помалку од лани, пораст на загриженоста е забележан во поглед на одливот на мозоци и емиграцијата, што е важно за 12 отсто од испитаниците, и овој индекс пораснал за 2 проценти во однос на 2017 година.

Дури 56 отсто од граѓаните се незадоволни со актуелната состојба на економијата во нивната земја.

Во Македонија, од 1.005 испитаници на прашањето колку сте задоволни од финансиската состојба на Вашето домаќинство, 11 отсто кажале дека е комплетно незадоволни, 23 отсто дека се главно незадоволни, а 37 отсто ниту задоволни, ниту незадоволни. Главно задоволни се 27 отсто од испитаниците, а 3 отсто од нив биле целосно задоволни.

Во поглед на безбедносната ситуација, односно ризиците од криминал, тероризам, неконтролирани миграции и оружени конфликти, во Македонија 14 отсто се целосно незадоволни и загрижени, главно задоволни се 26 отсто, 35 отсто се ниту задоволни, ниту незадоволни, а главно се задоволни 22 отсто. Само два отсто се целосно задоволни.

РСС е меѓувладино оперативно тело на земјите членки на Процесот за соработка во ЈИЕ, чиј основач и полноправен член е и Република Македонија.


Жбогар: Партиите го признаа парламентарното мнозинство, недостига вистинска дебата


Ресен, 30 март, 2017 - 21:34 (META) 

Позитивна работа е што политичките партии признаа дека има парламентарно мнозинство, но загрижува отсуството на вистинска дебата во Собранието, изјави денеска амбасадорот на Европската Унија во Македонија, Самуел Жбогар, за време на посетата на Ресен во рамките на проектот „ЕУ за тебе“.

– Позитивно е што сите политички партии признаа дека е формирано парламентарно мнозинство и тоа претставува еден чекор напред. Тоа што е важно е да има дебата, но во моментов таа дебата се состои повеќе од зборување отколку од слушање на пратениците еден со друг. Мислам дека тоа е загрижувачки. Во тој контекст е и она што ми го кажуваат луѓето од бизнис-сферата кои велат дека економијата забавува бидејќи државните институции не функционираат и на некој начин целата земја е ставена на чекање – изјави Жбогар.


Груевски: ВМРО-ДПМНЕ е сигурен победник на следните избори, кога и да се одржат


Скопје, 25 јуни, 2016 - 16:37 (META) 

ВМРО-ДПМНЕ е сигурен победник на следните избори, кога и да се одржат, а што порано – тоа подобро, за да се скратат штетите по економијата, рече денеска лидерот на партијата, Никола Груевски, во своето обраќање на 25. конференција на Унијата на млади сили на ВМРО-ДПМНЕ.

Груевски повторно ги нападна опозицискиот СДСМ и Специјалното јавно обвинителство, за кое рече дека работи непрофесионално и во насока на оцрнување и на загрозување на ВМРО-ДПМНЕ.

– За жал, многумина однадвор, без да направат длабинска анализа, потпаѓаат под приказната дека ова што го велам е неточно или е некоја кампања против СЈО. Многумина од нив, немајќи време за длабинска анализа, преземаат ставови еден од друг, верувајќи дека се точни. Раководството на СДСМ повторно се фокусира како да направи некоја нечесна игра во правец на изборите. Пак коваат план да ни направат некоја нова пакост, штета, интрига, подметнување, лажирање, насилство, закочување, оцрнување, клеветење, некаков хаос. Не можат да излезат од таа матрица – рече Груевски.

Според него, од почетокот на 2015 година до денес, ВМРО-ДПМНЕ и Македонија се цел на напад со специјални средства, а СДСМ ја има улогата да „одглуми вешт напаѓач“.

– Слабо ја вршат таа улога. ВМРО-ДПМНЕ како владејачка партија, направи проценка на ситуацијата и изгради своја сопствена стратегија за одбрана и за надминување на ситуацијата. Таа стратегија некој ја одобрува и ја поддржува, а некој ја критикува од различни аспекти. Секој различно, зависно од информациите што ги поседува, аналитичките капацитети, сопствениот карактер и политичкото искуство. Таа стратегија не подразбира дека проблемот ќе се надмине без пречки, опструкции, кризи во нејзиното спроведување, лични откажувања и жртви, привремени отстапки, попатни корекции и слично. Целите на стратегијата се: на прво место државата и нејзиниот интерес, како и интересот на народот, по цена за тоа да се жртвуваат одредени партиски или нечии лични интереси – рече лидерот на ВМРО-ДПМНЕ.

Тој изјави дека СДСМ одговорот за своите штетни политики ќе го добие од граѓаните на следните избори.

– Колку подоцна се одржат, поголема ќе е казната за СДСМ поради овие негови политики и штети што ги прави на сите граѓани. Во наредните четири или десет месеци, како и да е, Македонија ќе стави крај на оваа политичка игра и на политичката хајка. Избори ќе има и довербата ќе ја добие повторно ВМРО-ДПМНЕ, заедно со УМС како еден од нашите клучни столбови – посочи Груевски.

Тој во својот говор се задржа и на економските прашања и, меѓу другото, најави пет нови инвестиции во земјава.