!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Алаѓозовски: Не е скапо само уривањето, туку и одржувањето на објектите од „Скопје 2014“


Скопје, 30 јуни, 2017 - 16:12 (META) 

Одржувањето на објектите од проектот „Скопје 2014“ е исто толку скапо како и нивното уривање и според тоа, основната претпоставка со која почна изградбата на овој проект, како проект што на Владата ќе ѝ заштеди пари за кирии, е соборена, рече министерот за култура, Роберт Алаѓозовски, на денешната дебата за иднина на „Скопје 2014“, организирана од граѓанското здружение „Плоштад Слобода“.

– Сите опции се разгледуваат – и задржување и уривање и пренамена, но сè ќе биде направено со широка расправа и со меѓународен конкурс за можни решенија – рече Алаѓозовски.

Од „Плоштад Слобода“ рекоа дека ревизијата на „Скопје 2014“ не траба да ги опфати само финансиските и процедуралните аспекти во изградбата, туку и функционалноста на објектите.

Д-р Донка Барџиева, историчарка на уметноста, инсистираше на правните аспекти на „Скопје 2014“. Според неа, сето тоа е изградено незаконски и сугерираше отворање јавна расправа за иднината на проектот.

Архитектот Сања Раѓеновиќ-Јовановиќ вели дека 16 пати биле менувани законските прописи за да може формално-правно да се покријат сите градежни идеи за „Скопје 2014“.


ВМРО-ДПМНЕ: Ако има дискриминација, како Алаѓозоски зел 2.370.000 денари од Готен


Скопје, 12 декември, 2014 - 17:00 (META) 

Алаѓозовски е најдобар пример дека во Министерството за култура не постои дискриминација бидејќи од 2007 до 2014 година има добиено 2.370.000 денари преку издавачката куќа „Готен“, а само во Годишната програма за 2014 година има четири проекти во вредност од 121.000 денари, реагираат од ВМРО-ДПМНЕ, по прес-конференцијата на СДСМ.

„СДСМ треба да се срами што во континуитет говори со толку политичка омраза и деструктивност за позитивните промени што се случуваат во културата денес. Овие промени се очигледни и лесно споредливи со владеењето на СДСМ. Денес се случува спротивното од нивното време, кога во културата не се инвестираше, не се градеа нови нови објекти, не се отвораа нови културни установи, не се вработуваа нови млади дипломирани актери, режисери, драматурзи и други профили. Денес токму актери, режисери и издавачи кои се функционери или членови на СДСМ добиваат проекти од Министерството за култура“, стои во реакцијата.

Партијата посочува дека им е зголемена платата на вработените во областа на културата, обезбедени им се подобри услови за работа во нови или реновирани објекти и отворени се нови културни установи.


СДСМ: Дали некои високообразовни институции се претворени во вистинска работилница за дипломи?


Скопје, 12 декември, 2014 - 14:39 (META) 

Имаме сознанија за нерегуларности, клиентелизам, непотизам и за конфликт на интереси при вработувања театарски работници во театрите низ Македонија, истакна Роберт Алаѓозовски, претседател на комисијата за култура на СДСМ.

– Бараме одговор: Дали некои високообразовни институции се претворени во вистинска работилница за дипломи? Според нашите информации, студенти на овие факултети, од завршните години, набрзина дипломираат, испити се одржуваат во неиспитна сезона и уверенија се штанцаат надвор од законските рамки и процедури? Дали ова се прави за нивно експресно вработување во театрите? Дали по овој принцип е во постапка вработување на дваесетина актери, режисери и драматурзи во театрите во Скопје и во земјава? Дали е точно дека при вработувањата не се зема предвид рејтингот на образовните институции или класата на којашто студентите дипломирале, не се зема предвид успехот на кандидатите, ниту нивното портфолио, туку единствен критериум е близината до власта? – истакна Алаѓозовски.

Тој истакна дека СДСМ има сознанија дека при аудициите за вработување, некои факултети се фаворизираат надвор од објективно кредитираниот рејтинг на сметка на други. Дел од професорите ангажирани на одредени катедри, рече Алаѓозовски, имаат конфликт на интереси зашто тие ќе треба да ги примаат на работа студентите што претходно ги дипломирале.

– Поради сето ова, овие огласи се обжалени, но правдата не е истерана до крај, губејќи се во лавиринтите на зависното судство. Го повикуваме државниот просветен инспекторат да го испита скандалот со штанцањето дипломи. Го повикуваме трудовиот инспекторат да ги провери досегашните огласи и вработувањата со непотизам и по непринципиелни основи – рече Алаѓозовски.