Националната безбедносна агенција (НСА) на Соединетите Американски Држави, согласно новите законски одредби, од ноќеска на полноќ ја прекинува досегашната пракса на секојдневна проверка на податоците од телефонските разговори на милиони американски граѓани, пренесуваат светските агенции.
НСА својата масовна програма за следење на комуникациите ќе ја прекине вечерва во 23.59 часот по стандардно источно време, односно во 5.59 часот во недела по средноевропско време.
По ова, НСА ќе почне да користи ограничени методи за надзор на комуникациите, кој како што во петокот најавиле од Белата куќа мора да биде оперативен од ноќеска на полноќ.
Програмата за масовно следење на комуникациите беше воведена по терористичките напади од 11 септември 2001 година како мерка за заштита од нови напади.
Комисијата за ревизија што ја именуваше претседателот на САД, Барак Обама заклучи дека досегашниот режим за надзор не постигнал никаков конкретен напредок во борбата против тероризмот.
Агентите на НСА и другите агенции кои треба да ги спроведуваат новите законски одредби, од сега ќе мораат да обезбедат судски налог за да можат да бараат од телекомуникациските оператори дозвола за контрола на податоците за телефонските повици на секоја поединечна личност или група која сакаат да ја надгледуваат во период не подолг од шест месеци.
