Денешното гласање за вториот изборен круг на локалните избори во Дебар ќе ги следат четири акредитирани набљудувачи на ЦИВИЛ. Организацијата апелира до избирачките одбори во оваа општина да имаат предвид дека сите набљудувачи на ЦИВИЛ, без исклучок, се мобилни.
„Изборниот мониторинг се спроведува со цел да се помогне изборниот процес да биде законит, фер и демократски. Во прв ред, интересот е насочен кон заштита на фундаменталните човекови права и правото на глас. Затоа, очекуваме добра соработка со избирачките одбори, односно со целата изборна администрација“ – порачуваат од ЦИВИЛ.
Од ЦИВИЛ апелираат изборните органи и политичките партии, учесници во изборната трка, да го почитуваат Изборниот законик и добрите изборни практики и да овозможат мирен и достоинствен изборен ден. Организацијата ги повикува граѓанките и граѓаните да гласаат слободно и достоинствено, а секоја нерегуларност да ја пријават во ЦИВИЛ.
ЦИВИЛ ги повикува сите граѓанки и граѓани да пријавуваат изборни нерегуларности, притисоци и закани, корупција на Граѓанската пријава и да не подлегнуваат на дезинформации и говор на омраза.
За време на изборниот процес, на располагање е и веб страницата Слободни избори со онлајн формулар за пријава на изборни нерегуларности.
ЦИВИЛ континуирано ги повикува сите политички партии да се придржуваат кон Изборниот законик и добрите изборни практики. Изборниот законик има голем број слабости и не секогаш тоа што е дозволено со законот е и етички исправно.
Првиот извештај од изборниот мониторинг на ЦИВИЛ во Дебар, ќе биде објавен напладне.
Граѓанките и граѓаните од општина Дебар, дене ќе избираат меѓу актуелниот градоначалник Хекуран Дука, кандидат на ДУИ поддржан од СДСМ и коалицијата и Беким Поцеста од Алијанса за Албанците-Алтернатива поддржан од ВМРО-ДПМНЕ.
Во единствениот избирачки список во оваа општина запишани се 19.211 лица, а се гласа на 27 гласачки места. Во првиот круг правото на глас го оствариле околу 42 отсто од запишаните.
