Кина започна дводневни воени вежби околу Тајван, како „казна“ за, како што ги нарече, „сепаратистичките акти“ за одржување избори и инаугурација на нов претседател, јави Гардијан.
Кинеските државни медиуми објавија дека десетици борбени авиони на Ослободителната народна армија, кои носеле проектили, извршиле лажни напади врз „воени цели со висока вредност“, оперирајќи заедно со морнарицата и ракетните сили. Пропагандните снимки што се шират на интернет и кои беа објавени од државните медиуми, исто така ги споменуваат копнените балистички ракети „Донгфенг“, без да дадат информации дали биле искористени.
Како одговор на вежбите, Тајван ја обвини Кина за „ирационална провокација и нарушување на регионалниот мир и стабилност“.
Тајванското министерство за одбрана соопшти дека морските, воздушните и копнените сили се ставени во состојба на готовност, зајакната е безбедноста на базата, а на силите за воздушна одбрана и ракетните сили им е наредено да ги надгледуваат можните цели.
Овие вежби се прв одговор од Кина на инаугурацијата на Лаи Чинг-те како нов претседател на Тајван во понеделникот, а по победата на демократските избори во јануари. И Лаи и неговиот претходник Џаи Инг-вен се од про-суверенистичката Демократска напредна партија, која Пекинг ја смета за сепаратистичка.
Портпаролот на кинеската Ослободителна народна армија, Ли Кси, рече дека вежбите „ќе послужат како силна казна за сепаратистичките акти на силите за независност на Тајван и како строго предупредување против мешање и провокација од надворешни сили“, пренесе државната кинеска агенција Ксинхуа.
Кодното име на вежбата е „Заеднички меч – 2024А“, а аналитичарите сметаат дека суфиксот „2024А“ може да значи оти оваа година може да се очекуваат повеќе кинески вежби насочени кон Тајван.
Пекинг тврди дека Тајван е провинција на Кина и вети дека ќе ја припои, доколку е потребно, и на сила. Тајванската влада најави зајакнување на одбраната, истовремено повикувајќи ја Кина да престане со заканите и да се врати на дијалогот. Големо мнозинство од граѓаните на Тајван се противат на можноста за владеење на Кинеската комунистичка партија.
