Утрово во 7 часот се отворени избирачките места за локални избори во 89 градови и општини, меѓу кои Белград, Нови Сад, Ниш, Чачак, Ваљево и повеќето општини во Војводина. Избирачките места се затвораат во 20 часот.
Денеска, повеќе од 4,2 милиони граѓани на Србија можат да го искористат своето право на глас на локалните избори кои се одржуваат во 67 градови и општини и 23 урбани општини во Србија.
Изборниот молк, кој започна во четвртокот на полноќ, трае до 20:00 часот, што значи дека е забрането објавување оценки за изборните резултати во медиумите и на јавни собири, јавно да се презентираат кандидатите на изборите и нивните програми, како и повици гласачите да гласаат, односно да не гласаат за конкретни изборни листи или кандидати.
Денеска има прегласување на одредени изборни места во Белград бидејќи на локалните избори во главниот град на Србија во декември минатата година беа откриени голем број нерегуларности. Слично како на локалните избори во Македонија во 2014 година, таму владеачката партија беше откриена како врши изборен инженеринг преку преселба и носење на гласачи од други делови на земјата, но и од други соседни држави.
ЦРТА: Изборните резултати во Белград во голема мера потекнуваат од нелегален изборен инженеринг
Поради забелешките на опозицијата беа направени измени на Законот за единствениот избирачки список, при што гласачите кои извршиле промена на местото на живеење по 3.07.2023 година нема да имаат право да гласаат на новата адреса на која се пријавени. Исто така, беше прочистен и избирачкиот список.
Во Белград има 1.602.112 граѓани во избирачкиот список кои избираат од 14 избирачки листи. Број еден е изборната листа на Српската напредна странка наречена „Александар Вучиќ – Белград утре“, додека на второто место е листата „Руска партија – Срби и Руси, браќа засекогаш“.
Третата листа е „Извини, ова е за тебе – Петар Ѓуриќ“, а четврта е „Група граѓани – За зелен Белград – Кога, ако не сега – д-р Дејан Жујовиќ“. На петтата листа е „1 од 5 милиони – Белградски фронт – Ритам на градот, Душан Теодосијевиќ, градоначалник“, додека под број шест е листата на коалицијата „Бирамо Београд“. Таа коалиција ја сочинуваат Народното движење на Србија, Зелено-левичарскиот фронт/Не давимо Белград, Демократската партија, Движењето на слободни граѓани, Еколошкото востание и Новото лице на Србија.
Седма е листата „Ние сме силата на народот, проф. д-р Бранимир Несторовиќ“, а осма е „Народна листа – клуч за победата“ која ја сочинуваат Народна партија, Нова Србија и движењето „Живеам за Србија“. На деветтата листа е „Белград наш град – Василиос Провелегиос – Маријана Ивовиќ Вукотиќ – д-р Ферид Булиќ – Коалиција на силата“, додека десеттата е „Сојуз на Ромите на Србија – За Белград“. Под број 11 е листата „Белград е светот – Партија на правдата и помирувањето – Усама Зукорлиќ“.
Под реден број 12 е списокот „Д-р Саво Манојловиќ – Јас сум Белград – Оди и промени се“. Под број 13 е листата „Саша Радуловиќ – Доста е (ДЈБ) – Решение за промени“, а под 14 е листата на Граѓанската група „Ние – глас од народот“.
Во распределбата на мандатите можат да учествуваат само листите кои освоиле повеќе од три проценти од гласовите, додека овој услов не важи за малцинските листи.
