Со пари од странски донатори, локалната и од централната власт, во Источна Македонија во 2015 година се реализирале околу 500 проекти. Ова е податокот од годишниот извештај на Центарот за развој на Источно-планскиот регион (ИПР), кој беше презентиран денеска во Штип.
Пред претставници од 11 општини, невладиниот сектор и од бизнис-заедницата, Емил Василев, координатор на проекти, направи споредба со 2008 година кога овој регион бил на претпоследно место по развој, а од пред две години е рангиран на трето место од вкупно осум плански региони.
– Како што можете да видете, на територијата на Источно-планскиот регион се отвараат и нови компании, се гради нова инфраструктура. Дел од проектите ги финансира државата, некои се од странски фондови, а некои се и од приватни инвеститори. Затоа и сметаме дека програмата е успешна – вели Василев.
Во тековната година Источно-планскиот регион веќе работи на проекти поддржани од Бирото за рамномерен регионален развој, УНДП и од Амбасадата на Швајцарија.
