Водите на река Црна попладнево поплавија шеесетина куќи во пелагониската општина Могила. За ситуацијата да биде уште потешка, поради дефект на една од трафостаниците, целиот регион е без струја, а според најавите, проблемот ќе потрае поради поплавите.
Градоначалникот на општина Могила, Стевче Пивковски, вели дека крајно критична е сотојбата во три села, Чарлија, Радобор и Вашарејца, каде се евакуирани и жителите и стоката и сместени на повисоките локации на селата.
– Крајно сме вознемирени, мештаните се борат со надојдените води за своите семејства, стоката и за своите домови. Згора на сè, од вчера целиот регион е без струја. Црна се излева на неколку места и прави пустош. Сега добивме информација дека во Демирхисарско има нагло топење на снегот и секој час водата во Црна е сè поголема и поопасна – вели градоначалникот Пивковски.
Најтрагична, според него, е ситуацијата во селото Ношпал, каде од стотината населени куќи десно од регионалниот пат Новаци – Тополчани, поплавени се повеќе од 60 домови.
– Опасноста не доаѓа само од Црна, туку, за наша несреќа, се излева и Подмолска Река, а се излеа и деветтиот канал, така што во опасност се сите села на потегот од Ношпал преку Вашарејца, Добромири, Дедебалци, Алинци, Будаково до Трн. Сè што е пониско од реката, сè е поплавено. На терен е и Кризниот штаб на Општината, во соработка со Дирекцијата за заштита и спасување. Веќе работат три багери и два крана „либхер“. Потребна ни е помош – апелира Пивковски.
Битолската СДСМ вечерва преку соопштение ја обвнини локалната власт дека не презела никакви мерки иако била предупредена за можните последици.
– Дождот ги извади на површина последиците од погрешните политики на
ВМРО-ДПМНЕ. Неспособоноста и неодговорноста на власта на Никола Груевски удри по граѓаните. Неисчистеното речно корито на Црна Река предизвика прелевање на водата и пополави во Пелагониско. Градоначалникот Стево Писковски и ВМРО-ДПМНЕ не преземаа никакви мерки, иако беа предупредувани за последиците. Власта ги остави граѓаните сами да се справуваат со катастрофата што им ја нанесе токму нејзината неспособност – се вели во соопштението.
А.Б.