Утрово, властите на Русија и Украина се договорија за привремен прекин на огнот во два града во јужниот дел на Украина, Мариупол и Волноваха, пренесува Би-би-си.
Прекинот е со цел да се евакуира населението од овие градови и истиот започна денес во 09:00 часот. Додека ова се добри вести за жителите кои сакаат да си го напуштат живеалиштето, двата града остануваат единствените каде има привремен прекин и ситуацијата за напуштање е безбедна.
Ова е првиот прекин за пукање со огнено оружје или првиот прекин на било каков напад од страна на Русите откако пред десет дена започна инвазијата.
Во меѓувреме, како што јавуваат новинарите на Би-би-си, останатите градови во Украина продолжуваат да бидат бомбардирани.
„Населението ќе може да го напушти Мариупол преку пет часовен ‘прозорец’“, пренесува Ројтерс, што значи дека евакуацијата ќе трае до 14:00 часот попладне по локално време.
Југоисточниот пристанишен град Мариупол е опколен од руските сили и подложен на интензивни напади. До вчера населението беше сосема исклучено од основните потреби, напоменувајќи ги недостатоците на храна, лекови, вода и греење како и прекинатата телефонска и интернет комуникација.
Градот Волноваха кој се наоѓа во областа Донецк според вчерашните снимки што ги објави Гардијан изгледа опустошено, испразнет и претворен во руини од бомбардирањето.
