Инспектори на Регионалниот центар за гранични работи Север викендов извршиле контрола на ноќниот бар „Енерџи клуб“ на регионалиот пат Тетово – село Сарачино и затекнале 10 странски и три македонски државјанки, кои незаконски работеле во локалот, соопшти МВР.

Од странските државјанки, на возраст од 20 до 30 години, девет биле од Србија и една од Албанија.

При контролата, во објектот биле затекнати и сопственикот на локалот, А.М. (33) од Тетово, и српскиот државјанин Х.И. (34) од Прешево. Лицата биле приведени и задржани во СВР Тетово, а против седум странски државјанки била поведена прекршочна постапка.

Основниот суд Тетово им одредил парична казна и мерка забрана за влез во земјава во период од една година.

Од МВР додаваат дека по целосното документирање на случајот, против сопственикот на ноќниот бар ќе биде поднесена пријава, а кривична пријава ќе биде поднесена и против српскиот државјанин Х.И., кој е осомничен дека им помагал на две странски државјанки илегално да ја преминат државната граница.