Извор на фотографија: Кабинет на Претседател на РСМ

Претседателот на Република Северна Македонија Стево Пендаровски денеска ја започна дводневната официјална посета на Хрватска. Тој во Загреб со државни и воени почести беше пречекан од претседателот на Република Хрватска, Зоран Милановиќ, информираат од Кабинетот на Претседателот на РСМ.

По тет-а-тет средбата на претседателот Пендаровски со претседателот Милановиќ, делегациите на Република Северна Македонија и Република Хрватска одржале пленарен состанок за време на кој биле потврдени искрените пријателски односи и плодниот политички дијалог меѓу двете држави. Притоа, биле разменети мислења за повеќе аспекти од билатералните односи, бил реафирмиран константниот интерес за нивно натамошно продлaбочување, а покрај останатото, соговорниците разгледале и прашања од значење за европската иднина на Република Северна Македонија и регионот на Западен Балкан. 

Хрватска е постојан поддржувач на нашите европски интеграции и за време на посетата на претседателот Пендаровски се очекува да биде реафирмирана поддршката за Северна Македонија да ги почне пристапните преговори со Европската Унија, информираат од претседателскиот кабинет.

Претседателот Пендаровски денеска ќе оствари средби и со претседателот на Парламентот на Република Хрватска, Гордан Јандроковиќ и со хрватскиот премиер Андреј Пленковиќ.

Во текот на утрешниот ден, претседателот Пендаровски ќе се обрати на билатерална деловна средба – со фокус на инвестиции, која се организира во соработка со Хрватската трговска комора, а на која ќе присуствува и македонска бизнис делегација.