Општина Центар го заврши новогодишното украсување во центарот на Скопје, додека кај Град Скопје оваа обврска е во тек на реализација. На помалку од 20 дена од новогодишната ноќ, локалните власти информираат за текот на реализацијата на новогодишното украсување.
„Годинава општината е украсена на повеќе локации каде се поставија новогодишни елки, светлосни фигури, украсни лед сијалици и други новогодишни украси. Украсувањето започна од улицата „Орце Николов“ па продолжи кон улиците Боемска 1 и 2 каде на неколку локации е поставена мрежа со сијалички, светлосни фигури на бандери, ѕвездено небо и 9 метарска новогодишна елка. Украсен е и Скверот пред општината каде има поставено мрежа со сијалички на сите дрва, светлосни фигури, забавен парк и дрвени куќички“, информираат од Општина Центар.
Градоначалникот на Општина Центар, Горан Герасимовски вели дека граѓаните заслужуваат да уживаат во предновогодишната атмосфера и додава дека оваа скопска општина е единствената украсена во Градот Скопје.
Покрај во населбата Дебар Маало, Општина Центар постави новогодишни украси и на скверот и паркот во населбата Капиштец.
Од Град Скопје пак информираат дека главниот град ќе добие соодветно новогодишно украсување, наспроти прашањата на дел од медиумите и граѓаните зошто тоа не е направено до сега. Главниот град ќе блесне во новогодишната магија на 15 декември, велат од Град Скопје.