Шефицата на Мисијата на ОБСЕ во Скопје, Нина Суомалаинен, денеска ѝ понудила поддршка и соработка со специјалната јавна обвинителка, Катица Јанева, соопштија од Мисијата на ОБСЕ во Скопје по денешната средба.
На средбата, како што се наведува во соопштението, Суомалаинен и Јанева разговарале за новата улога на обвинителката и за претстојните предизвици.
Суомалаинен ѝ честитала на Јанева за формирањето на нејзиниот тим од вкупно 12 обвинители, истакнувајќи дека канцеларијата на обвинителката мора да продолжи да биде независна и слободна од секаков вид притисоци, за да постигне резултати кои ќе бидат фер и објективни.
– Важно е дека обвинителката има тесна соработка со институциите. Нашата мисија е тука да помогне – рекла шефицата на Мисијата на ОБСЕ во Скопје.
Таа, исто така, го поздравила договорот постигнат на средбата на лидерите на политичките партии на 5, односно на 6 ноември годинава, за понатамошно спроведување на Договорот од Пржино.
– Правилното спроведување на Договорот од Пржино и почитувањето на законите, вклучувајќи ги тие што беа усвоени вчера во Собранието, ќе овозможат еднакви услови на претстојните избори – посочила Суомалаинен.
