Споменици од вредното историско минато на земјава се оставени пред Музејот на град Скопје без соодветна заштита од атмосферски влијанија. Наместо спомениците да бидат покриени со стреи, веќе неколку години наназад тие се оставени без заштита од врнежите од дожд и снег. На дел од спомениците видливо е дека има мов како резултат на влагата. Ваквата состојба со историските споменици се случува токму пред влезот на музејската установа, во самиот центар на Скопје.
Мета.мк по електронска пошта на 7 и на 13 март во два наврати испрати прашања на оваа тема до Музејот на град Скопје. Наместо писмени одговори или преку директна средба, одговорите од музејската установа ги добивме преку телефон на 17 март.
Од музејската установа велат дека со постојниот елаборат, кој бил усвоен од Конзерваторскиот центар, предвидена е заштита на целата зграда на старата железничка станица, сосе спомениците поставени пред влезот на музејот. Сепак, со овој елаборат не било предвидено покривање на овие споменици, а за да се направи вакво нешто, неопходно е да се поднесе нов елаборат за заштита на објектот со спомениците, кој ќе треба да се донесе од Конзерваторскиот центар-Скопје и да се добие позитивно мислење од Управата за заштита на културното наследство.
Од Музејот на град Скопје за Мета.мк велат дека размислуваат да поднесат нов елаборат, со кој би се овозможило покривање на археолошките споменици и нивна заштита од атмосферски влијанија. Тие чекаат да заврши изградбата на комплексот на Лимак, кој се наоѓа веднаш позади објектот. Од музејската установа додаваат дека археолошките споменици нема да се преместуваат во внатрешни простории, туку ќе се покријат. Сепак, информација за конкретен рок за тоа кога би се покриле спомениците не добивме.
За разлика од Скопје, во дворот на Археолошкиот музеј во Загреб вредните историски споменици од римскиот период се заштитени од надворешни атмосферски влијанија со стреи. Мета.мк направи обиколка на музејското здание во хрватскиот главен град, при што увидовме дека буквално секој споменик е заштитен од врнежи од дожд и снег, а со тоа и состојбата во која се наоѓаат вредните историски дела е многу подобра од оние лоцирани пред скопскиот музеј.
