Седум проекти добиваат поддршка во рамките на јавниот повик за справување со климатски промени 02-2, кој Фондот за иновации и технолошки развој, ФИТР, го реализира во соработка со Програмата за развој на ОН, УНДП, Министерството за надворешни работи на државата Израел, Министерство за животна средина и просторно планирање на С.Македонија, како и две партнер организации, Кајама Центарот за одржлив дизајн од Израел и организацијата Македонија 2025.
Избраните компании нудат различни иновативни решенија за справување со глобалниот проблем со климатските промени и имаат за цел намалување на негативните последици по јавното здравје.
Прворангираниот проект Bank of trees е иновативен начин за штедење и инвестирање на средства преку креирање на првата банка базирана на дрвја. Целта на проектот е придонес кон зголемена природна апсорпција на јаглерод диоксид од атмосферата, додека во исто време се генерира добивка за нејзините корисници.
„Останатите проекти предвидуваат и напредно истражување и развој на нов вид храна во сточарството што, како процес, се смета за еден од најголемите загадувачи, потоа изградба на првата концентрациона соларна електрана во Северна Македонија, развој на нов производ – биоќумур и негова употреба во земјоделие, систем за култивација на мов и производство на внатрешни и надворешни панели за природно прочистување на воздухот, преработката на опасен отпад, отпадни лушпи од јајца во додатоци во исхрана за хумана употреба, како и соларен греач и прочистувач на воздух“, соопштуваат од ФИТР.
За финансирање проекти под овој повик беше износ од 5 милиони денари, вкупниот обем на инвестици во оваа фаза е 3,7 милиони денари, како и 750.000 денари учество на самите апликанти. Уште за три компани е отворена можност за кофинансирање, ако се обезбедат дополнителни средства.
Проектите се оценуваа според пет критериуми: влијание на животната средина и справување со климатски промени, степен на иновативност, квалитет на предлог-проект, капацитет на проектниот тим односно конзорциумот и потенцијал на пазарот.
Од ФИТР дополнуваат дека, поради пандемијата со ковид-19 и интересот да се обезбеди менторска поддршка за подготовка на апликациите, јавниот повик беше ре-објавен на 02 јуни, со траење до 20 јули 2020 година. Пристигнаа вкупно 39 апликации, од кои 28 продолжија во фазата на финална селекција. Ова е втор повик на ФИТР наменет за проекти наменети за заштита на животната средина.
