Возач со својот автомобил синоќа се забил во скелињата на зграда чија фасада се уредува на булеварот Димитрие Чуповски во центарот на Скопје.
Според вработени во дуќаните кои се наоѓаат во непосредна близина на местото на ударот, возачот наводно изгубил контрола кога движејќи се по улицата му излегле кучиња. Тие велат дека ударот бил многу силен.
– Колегите што ноќеска беа на смена најпрво слушнале лаење на кучиња, а потоа и многу силен удар – ни изјави вработена во пекарница.
Таа вели дека возачот наводно не бил сериозно повреден, но кога излегол од возилото имал крв на себе.
Засега нема официјална информација од полицијата за настанот, ниту во каква состојба е возачот на автомобилот марка „шкода“.
Работниците го расчистуваат местото на сообраќајката, а таму се уште се наоѓа автомобилот. Сообраќајот во овој дел од градот се одвива забавено со помали задржувања на автомобилите.
