Владата го финишира планот за соработка со „Мајкрософт“


       
Скопје, 21 јуни, 2018 - 9:44 (META) 

Премиерот  Зоран Заев денеска примил делегација на компанијата „Мајкрософт“ што ја предводел Филип Рог, претседател на компанијата за Централна и Источна Европа, информираат од Владата.

На средбата било разговарано за финиширање на подготовките кои треба да се преточат во договор за соработка на Владата со „Мајкрософт“, кои биле започнати во Давос оваа година.

Премиерот Заев информирал на средбата дека Владата е особено заинтересирана за целосна дигитализација на јавната администрација, како една од целите на Стратегијата за информатичка и компјутерска тегнологија, која за приоритет има побрзи и поквалитетни услуги за граѓаните.

„Во разговорот беше истакнато дека воведувањето на модерна и технолошки напредна инфраструктура, и со соодветно обучена администрација и пријателски дигитални услуги се предност и кога станува збор за привлекување на директни странски инвестиции, како и за приватните компании во земјата, на кои ќе им биде максимално олеснета комуникацијата и извршувањето на работите на инвеститорите низ дигитализираните процедури“, се вели во соопштението.

Посебно внимание на денешната средба било посветена на темата сајбер-безбедност, и на можностите што Мајкрософт може да ги понуди на овој план, за да се обезбедат владините комуникации и за да се реагира на сајбер нападите брзо, одговорно и ефикасно, како и за потребата од компатибилност на безбедносните системи и протоколи со оние на НАТО и на ЕУ.