!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Иванов: Живаљевиќ извести дури откако влезе во Собранието, за да има алиби


Скопје, 23 август, 2017 - 21:33 (META) 

Посочениот советник на претседателот Иванов, не е овластено лице за пријавување на движење и престој на странски претставници и во конкретниот случај постапил согласно безбедносните протоколи, за што изготвил и архивирал извештаи проследени до надлежните претпоставени. Ова стои во експресната реакција на кабинетот на претседателот Ѓорге Иванов по изјавата на советникот за безбедност во амбасадата на Србија во Македонија и припадник на Безбедносно-информативната агенција (БИА), Горан Живаљевиќ, дека одобрение за да влезе во Собранието на 27 април, добил од советникот на Иванов.

Во соопштението од кабинетот се вели дека „согласно законите во Македонија, надлежен државен орган за комуникација со странски дипломатски преставници е Министерството за надворешни работи, додека посебна служба на Собранието се грижи за редот во зградата.“

 „Кабинетот на претседателот не е надлежен ниту овластен да дава дозвола за престој и одобрение за активности на странски преставници и дипломати во Собранието. Изјавата на Живаљевиќ е спротивна на фактите. Македонските служби не побарале услуги од него. Тој по завршување на дејствијата и активностите во Собранието, испратил пораки до лица вработени во институциите, меѓу кои и посочениот советник, дека бил во Собранието со цел да обезбеди алиби и да ја намали одговорноста за своето постапување. Фактите говорат дека критичниот ден пред да влезе во Собранието, амбасадорот на Република Србија, односно дипломатот, не побарал писмена или усмена дозвола од овластено лице и надлежен државен орган, туку откако го завршил дејствието известил за своите активности, со што не може да ја намали одговорноста за неовластен престој во Собранието“, се додава во соопштението.

Од кабинетот на претседателот исто така велат дека „во изминатиот период реагирале до амбасадорот на Србија да се прекине со злоупотреба на името на советникот, со цел да го користи како алиби и да одбегне одговорност за непрофесионалното однесување на дипломатот.“

„Случајот со неовластениот престој на господинот Живаљевиќ во Собранието е затворен во постигнат договор помеѓу службите“, се додава во соопштението.


ВМРО-ДПМНЕ: Вучиќ не ја кажува вистината, проверивме


Скопје, 23 август, 2017 - 16:15 (META) 

ВМРО-ДПМНЕ преку соопштение за јавноста ги демантира тврдењата на српскиот претседател Александар Вучиќ дека некоја македонска институција му дала согласност на српскиот дипломатски претставник Горан Живаљевиќ да влезе во парламентот на Република Македонија за време на инцидентот.

„ВМРО-ДПМНЕ, имајќи предвид дека сега е во опозиција, во текот на денешниот ден во рамките на своите можности вршеше проверки и утврди дека ниту МНР, ниту владата, ниту парламентот, ниту МВР или Агенцијата за разузнавање не добиле такво барање, ниту издале таква согласност и одобрение“, велат од опозициската партија.

Вучиќ во интервју за српската државна телевизија „РТС“ вчера изјави дека Живалевиќ за да влезе во Собранието го прашал нависокиот преставник на извршната власт во Македонија.

– Па тој Живаљевиќ не отишол на своја рака. Не ме прашал мене, ниту кого било во нашата земја, иако нам треба да ни полага сметки. Тој го прашал највисокиот претставник на извршната власт на Македонија, директно го прашал: „Јас сакам да бидам таму. Дали имате нешто против?“. Тие беа целосно запознаени со неговото присуство – изјави Вучиќ.

ВМРО-ДПМНЕ ја повика владата да провери дали такво нешто имало, и доколку имало да го објави документот со кој некоја институција издала такво одобрение. Од партијата велат дека доколку не се прикаже таков документ во наредните ден два, ќе констатираат дека дефинитивно такво нешто не е издадено.

Во врска со дипломатскиот скандал, ВМРО-ДПМНЕ изрази надеж дека македонската и српската влада ќе ги расчистат сите детали и дека ќе ја информираат јавноста.

„Чекорите кои ги превзема Република Србија, степенот на кој се превземаа мерки од нивна страна, како и изјавите на српските политичари не кореспондираат со изјавите на македонските претставници, што укажува дека постојат детали за кои јавноста не е запознаена“, додаваат од партијата.


Поранешниот прв разузнавач, Виктор Димовски, е нов генерален секретар на МНР


Скопје, 29 јуни, 2017 - 16:43 (META) 

Амбасадорот и поранешен директор на Агенцијата за разузнавање, Виктор Димовски, со решение на шефот на македонската дипломатија, Никола Димитров, е поставен за нов државен секретар во Министерството за надворешни работи, соопштија денеска од МНР.

Виктор Димовски е доктор на политички науки и дипломат од кариера со повеќе од 20 години дипломатско искуство. Во изминатиот период бил амбасадор во Србија и Црна Гора, како и во Израел.

Димовски бил и помошник-министер, државен советник и специјален советник, како и национален координатор на Македонија во повеќе регионални иницијативи, претседавач на Комитетот на политичките директори на процесот за соработка во Југоисточна Европа и претседател на македонскиот дел на државната Комисија за утврдување на границата со Сојузна Република Југославија.

Во периодот од 2007 до 2009 година Димовски беше директор на Агенцијата за разузнавање.


Претставата „Европејци“ премиерно пред тетовската публика на 22 април


Тетово, 17 април, 2017 - 14:59 (META) 

Претставата „Европејци“ од српскиот драмски писател Мирољуб Неделковиќ, премиерно ќе се одржи во Центарот за култура „Ило Антески Смок“ во Тетово на 22 април. Претставата е современа комедија која ги исмејува балканскиот и македонскиот менталитет.

– Во оваа претстава се прикажува кој е поголем Македонец. Публиката ќе излезе насмеана, но и замислена – вели актерот Глигорие Стојановски.

Режисер на „Европејци“ е Мирко Видоески, кој исто така се појавува во улога на американски дипломат.

– Оваа претстава, која e политичка сатира, ќе биде хит. Во неа се говори за поделбата на Македонците – вели Видоески.

Два дена подоцна, на 24 април, комедијата „Европејци“ ќе биде изведена пред скопската публика во Драмски театар.


Севернокорејски дипломат осомничен за убиството на Ким Јонг-нам во Малезија


Џакарта, 22 февруари, 2017 - 9:30 (META) 

Малезиската полиција осомничи претставник од Амбасдата на Северна Кореја за убиството на Ким Јонг-нам, а уште еден осомничен за случајот е поврзан со државната авиокомпанија на Северна Кореја.

Како што јавуваат локалните медиуми, двајцата осомничени сè уште се во Малезија и се повикани на распит. Дипломатот е со ранг втор секретар во амбасадата.

Полицијата смета дека четири други лица, осомничени за убиството, побегнале на денот на нападот и заминале во Пјонгјанг. Минатата недела малезиските власти уапсија Севернокореец и две жени од Виетнам и од Индонезија во врска со убиството.


Припадник на обезбедување уби авганистански дипломат во Пакистан


Карачи, 6 февруари, 2017 - 14:20 (META) 

Припадник на обезбедување усмртил авганистански дипломат во пакистанскиот град Карачи, јавуваат светските агенции.

Харис Кан, портпарол на авганистанскиот конзулат во Карачи, изјави дека третиот секретар на конзулатот, Мухамед Заки Абду, починал од повредите откако бил застрелан.

Чуварот, кој е авганистански националист, е приведен, изјави претставник на пакистанската полиција Азад Кан.

Како што соопштија двајцата претставници, мотивот за убиството сè уште не е познат. Инцидентот се случил во конзулатот и, најверојатно, како што се наведува, убиството е извршено од лични причини.


Убиен уште еден руски дипломат


Москва, 20 декември, 2016 - 15:45 (META) 

Педесет и шестгодишниот руски дипломат Пјотр Пољшиков синоќа е застрелан в глава во својот дом во Москва, јавува ТВ „Рен“.

Информацијата за убиството е објавена набргу по веста за убиството на рускиот амбасадор во Анкара, Андреј Карлов.

Околностите на убиството не се познати, а полицијата испитува дали станува збор за самоубиство или убиство. Сопругата на Пољшиков била во станот, но не е повредена.

Покрај телото, во станот се пронајдени и две чаури. Пиштолот е пронајден под мијалникот во бањата.

Руските медиуми јавуваат дека Пољшиков бил началник на одделот за Латинска Америка во руското министерство за надворешни работи. Некои наведуваат дека тој го напуштил МНР, но не е познато дали продолжил да работи во некоја друга руска владина служба.

Пољшиков претходно работел во руската амбасада во Боливија.


Руски полицаец нападнал американски дипломат


Москва, 8 јули, 2016 - 10:48 (META) 

Руската телевизија НТВ објави снимка на која се гледа како руски полицаец и американски дипломат се тепаат на влезот на американската амбасада во Москва.

Американската амбасада засега не го коментира настанот.

Првичните информации, кон крајот на јуни, ги објави „Вашингтон пост“, повикувајќи се на изјава од американски дипломати, кои за инцидентот го обвинија полицаецот.

Руските претставници, сепак, тврдат дека дипломатот го нападнал полицаецот.

На снимката на НТВ се гледа како пред споредниот влез на амбасадата запира такси, од кое излегува дипломат кој се движи кон вратата. Во тој момент, од стражарската куќичка излегува униформиран полицаец кој го соборува дипломатот на земја.

Портпаролот на руското министерство за надворешни работи вели дека полицаецот сакал да ги провери документите и да се увери дека лицето не претставува опасност за амбасадата, но оти лицето со лакотот го удрило в глава. Руското МНР тврди дека претставникот на амбасадата, всушност, е агент на ЦИА.


Ариан Спасе од Мала Преспа, нов албански амбасадор во Унгарија


Охрид, 19 март, 2016 - 11:29 (META) 

Претседателот на Република Албанија, Бујар Нишани, за нов вонреден и ополномоштен амбасадор во Република Унгарија го назначи Ариан Спасе, допломат од кариера, етнички Македонец од познато интелектуално семејство.

Ариан Спасе е внук на писателот Стерјо Спасе, еден од најзначајните претставници на современата албанска литература и еден од најуспешните писатели од македонско потекло во Република Албанија.

Стерјо Спасе е роден во 1914 година во Глобочани, денес Општина ПустецМала Преспа. Се занимавал со педагошка дејност.

Покрај во Албанија, се школувал на Универзитетот „Флоренца“ во Италија, додека магистратура завршил во тогашниот СССР. Негово најпознато книжевно дело е романот „Од живот за живот – зошто?“.

 


Ако викендов нема договор, Пржино не важи!


Скопје, 21 октомври, 2015 - 14:10 (META) 

Викендов ќе се знае точно во која насока ќе се движат преговорите и дали се успешни, дознава „Мета“ од дипломатски извори.

– Секогаш на преговорите треба да им се дадат уште неколку шанси. Деновиве ќе се одржуваат само билатерални средби, а работната група ќе се состане само доколку е сигурно дека ќе се постигне некаков договор – вели нашиот извор.

Тој вели дека ако преговорите не бидат успешни, „Европската унија ќе ја третира Македонија како Белорусија“.

– Ако нема договор до викендов, Договорот од Пржино не важи – вели нашиот извор.