!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Бунтовниците се евакуираат од предградието на Дамаск


Дамаск, 8 мај, 2017 - 14:56 (META) 

Стотици сириски бунтовници и нивните семејства, денеска во согласност со договорот со сириската влада, почнаа да го напушаат предградието на Дамаск, Барзех, кое е под опсада на владините сили и се упатуваат кон провинцијата Идлиб, која е под контрола на бунтовниците. Таа се наоѓа долж границата со Турција.

Спогодбата беше постигната вчера.

Во текот на последните месеци, десетици илјади лица, кои живееја во регионите што се под опсада на владините сили во Хомс и во Алепо, се предадоа, согласувајќи се да бидат преместени во области што се контролирани од опозицијата во други делови на Сирија.

Сирискиот центар за надзор на човековите права соопшти дека денеска се очекува околу 1.500 лица да го напуштат предградието, а во текот на следните денови ќе бидат евакуирани уште лица.


Жестоки борби помеѓу сириските владини сили и бунтовниците во Дамаск


Дамаск, 19 март, 2017 - 17:34 (META) 

Жестоки борби избувнале денеска помеѓу сириските безбедносни сили и бунтовниците во источниот дел на главниот град на Сирија, Дамаск, пренесува „Би-би-си“. Борбите почнале откако бунтовничките сили извршиле ненадеен напад во областа Џобар, која е блиску до центарот на градот.

Според жителите на областа, бунтовниците истрелале артилериски гранати и ракети во центарот на градот за време на ненадејниот напад. Биле изведени и два самоубиствени бомбашки напади со автомобили во областа Џобар, во обид да ја пробијат одбранбената линија на сириските владини сили.

Сириската војска на акцијата на бунтовниците одговорила со воздушни напади.

Според сириските државни медиуми, при нападот на Џобар бунтовниците користеле и тајни тунели.

Во Дамаск, како што пренесува „Би-би-си“, има само неколку области кои се под контрола на бунтовниците, а Џобар е најблиската до центарот на градот. Борбите за контрола на военото подрачје, кое е поделено меѓу бунтовниците и џихадистите од една и владините сили од друга страна, траат повеќе од две години.


Повеќе од 40 сомалиски мигранти убиени во близина на брегот на Јемен


Сана, 18 март, 2017 - 10:57 (META) 

Повеќе од 40 сомалиски мигранти, меѓу кои имало жени и деца, биле убиени ноќеска во близина на брегот на Јемен, додека биле превезувани со чамец, јавуваат светските агенции.

Чамецот, со околу 140 мигранти од Сомалија, бил погоден од лесно оружје во близина на пристанишниот град Ходеда, на западниот брег на Јемен, соопштила канцеларијата за бегалци на Обединетите нации (УНХЦР). Чамецот, и покрај нападот, успеал да доплови до пристаништето, кое е под контрола на бунтовниците Хути.

Засега никој не ја презел одговорноста за нападот. Бунтовниците за нападот ја обвинуваат арапската коалиција, која, пак, ги отфрла ваквите наводи.

Во чамецот, како што објави Меѓународната организација за миграција (ИОМ) во Јемен, биле пронајдени телата на 42 лица.

Според управата на пристаништето, преживеаните мигранти заедно со тројца јеменски шверцери биле уапсени.


Сириската влада е подготвена за размена на затвореници


Дамаск, 13 февруари, 2017 - 13:40 (META) 

Сириската влада соопшти дека е подготвена да ослободи затвореници во замена за цивили и војници кои држат бунтовници.

Неименуван претставник, за сириската телевизија, изјавил дека понудата е дадена во пресрет на дводневната мировна конференција која неделава треба да се одржи во Астана.

Владата и бунтовниците минатата недела разменија десетина лица, вклучувајќи жени и деца, кои бунтовниците со години ги држат во заложништво.

В четврток и в петок во казахстанската престолнина ќе се собeрат претставниците на сириската влада и бунтовници, како и делегати на Русија, Турција, Иран на подготвителнi разговори пред да продолжат мировните преговори во Женева.


Повеќе од 10 жртви во разгорените борби во Источна Украина


Авдиивка, 30 јануари, 2017 - 16:42 (META) 

Повеќе од 10 луѓе загинале во борбите во Источна Украина денеска, во територија надвор од контрола на проруските бунтовници, јавија светските агенции. Тоа се меѓу најжестоките борби во последните неколку седмици, откако стапи на сила новото примирје, на 23 декември лани. Примирјето беше нарушено неколкупати оттогаш.

Седум украински војници загинале во борбите што почнаа меѓу армијата на Украина и проруските бунтовници во и близу гратчето Авдиивка, кое се наоѓа на линијата на фронтот. Загинал и командант на бунтовниците, познат како Грек, и двајца бунтовници. Има непотврдени извештаи и за двајца загинати цивили. Една жена, наводно, загинала при гранатирање на гратчето Макијивка, кое е под контрола на бунтовниците.


Судири меѓу бунтовниците и владините сили на кратко го прекинаа примирјето во Сирија


Дамаск, 30 декември, 2016 - 10:49 (META) 

Само два часа по стапувањето на сила на примирјето во Сирија, договорено со посредство на Русија и на Турција, избувнале судири меѓу бунтовниците и владините сили, тврди сириската Опсерваторија за човекови права со седиште во Лондон, јавуваат светските агенции.

Опсерваторијата наведува дека бунтовниците го прекршиле примирјето, заземајќи позиции во провинцијата Хама, но додава дека судирите набргу прекинале и дека во моментов е мирно.

Портпаролот на бунтовничката група Џаиш ел наср, Мохамед Рашид, тврди дека примирјето го прекршиле владините сили, со гранатирање на селата Атшан и Скеик во провинцијата Идлиб, која се гранични со Хама.

Според Опсерваторијата за човекови права, пукотници имало и во јужните сириски провинции Дера и Кунејтра.

Примирјето меѓу владините сили и бунтовниците, посредувано од Москва и од Анкара, стапи на сила ноќеска на полноќ, по локално време.

Договорот за примирје не ги вклучува терористичките групи, како што се Исламска држава и поранешниот фронт Ал нусра.


Бунтовници ја загадиле водата во Дамаск


Дамаск, 24 декември, 2016 - 12:08 (META) 

Претставниците на водоводот од Дамаск јавија дека се принудени да ја намалат испораката на вода во сириската престолнина затоа што бунтовниците ја загадиле водата со дизел-гориво.

Додека проблемот не се реши, жителите на Дамаск ќе користат резерви на вода, најавија градските власти.


Сириската војска ја презеде контролата врз Алепо


Алепо, 22 декември, 2016 - 20:30 (META) 

Сириската војска денеска соопшти дека ја презела целосната контрола над градот Алепо, по евакуацијата и на последната група цивили и бунтовници од градот, јавува „Би-би-си“.

Претставник на Обединетите нации (ОН) претходно соопштил дека за една недела, односно од минатиот четврток до денеска повеќе од 34.000 лица биле евакуирани од градот.

Евакуираните цивили и припадници на бунтовничките сили се однесени на територија под нивна контрола, западно од Алепо и во провинцијата Идлиб.

Преземањето на контролата врз Алепо, како што пишува британскиот национален сервис, претставува голема победа за сирискиот претседател Башар ал Асад, чија офанзива на градот беше помогната со воздушни напади на руската воена авијација.

Во соопштението, објавено на сириската државна телевизија, војската навела дека е вратена безбедноста во Алепо откако градот е ослободен од тероризмот и од терористите, термин кој сириската влада го користи за бунтовниците.

Инаку, Алепо пред почетокот на немирите и војната во 2011 година, беше најголемиот град во Сирија и економски и индустриски центар во земјата.


Продолжува евакуацијата во Алепо, 1.000 луѓе го напуштија градот


Алепо, 19 декември, 2016 - 10:08 (META) 

Околу 1.000 луѓе го напуштија денеска источниот дел на Алепо, при новата евакуација на жителите во тој дел од градот, кој е под опасада на владините сили.

Шефот на единицата на лекари и на волонтери кои ја коордирнираат евакуацијата, Ахмад ал Дбис, изјави дека луѓето биле евакуирани со 20 автобуси и се упатиле во западниот дел на градот.

Иствреме се врши евакуација и од градовите Фуа и Кафаја, во согласност со договорот за прекин на огнот со кој се овозможува последните бунтовници и цивили да ја напуштат бунтовничката енклава во источниот дел на Алепо.

Денеска членките на Советот за безбедност на ОН постигнаа договор за нацрт-резолуцијата за набљудувачите во Алепо, откако Франција ги зеде предвид забелешките на Русија, а гласањето треба да биде денеска.

Со нацрт-резолуцијата што ја предложија Русите, генералниот секретар на Обединетите Нации се повикува да ја осигури безбедноста во „координација со заинтересираните страни“, вклучувајќи ја и сириската влада која сега го контролира источниот дел на Алепо, за да може претставниците на ОН да ги следат условите во кои се наоѓаат цивилите што останале во Алепо.


Продолжува евакуацијата на цивили и на бунтовници во Алепо, соопштија сириските власти


Алепо, 15 декември, 2016 - 11:26 (META) 

Сириските воени претставници денеска соопштија дека се направени сите подготовки и оти евакуацијата на цивили и на бунтовници од Алепо може да почне во „секој момент“.

Опозициските набљудувачки групи синоќа соопштија дека евакуацијата веќе почнала, но новите наводи не можеа веднаш да бидат потврдени.

Спогодбата за евакуација на бунтовниците и на цивили од источен Алепо повторно е постигната и ќе почне да се спроведува наутро, соопштија синоќа сириските бунтовници.

Анкара и Москва во вторникот постигнаа договор за прекин на огнот во Алепо за да се овозможи евакуација на цивили, но нападите продолжија и во средата наутро.