Како резултат на активностите на проектот „Акцискиот план – Скопје зелен град“, и на низата други значајни сеопфатни проекти, оваа година не разговараме за загаден воздух во главниот град, односно имаме огромно намалување на бројот на денови со надминати концентрации на ПМ-честички, изјави премиерот Зоран Заев кој беше дел од активноста што ја организираше Град Скопје и градоначалникот Петре Шилегов по повод Светскиот ден на животната средина.
Тој додава дека некои ќе се повикаат на времето, климатските промени, но било факт дека намалувањето е и резултат на заедничка акција на сите.
„Резултат е и на зголемената свест кај граѓаните, која е на највисоко ниво до сега и е дополнителен поттик за оваа Влада да продолжи со еколошките проекти како што беше замената на загадувачките печки на дрва и на фосилни горива со еколошки чисти инвертери во Скопје и во неколку други градови. Граѓаните, особено помладите, сѐ повеќе користат превозни средства кои не загадуваат како велосипеди или електрични тротинети, а сериозен поттик за ова е исполнувањето на потребите на луѓето кои пешачат и возат велосипед како клучен дел од решенијата за урбана мобилност во здрава животна средина. Во Скопје веќе се надминати 100 километри добро организирани велосипедски патеки и стануваат многу препознатливи одделните велосипедски и пешачки зони долж улиците и булеварите проследени со зелени појаси,“ изјави Заев.
Тој додаде дека во градот Скопје има повеќе зеленило, ослободени дрва, поставувани се зелени бариери помеѓу пешаците/велосипедистите и возилата, нови паркови, зелени кровови.
„И не само во Скопје. Во 36 општини, во 108 јавни објекти има фотоволтаични системи и повеќе зелени површини и се спроведуваат мерки за директно справување со изворите на загадување.Еколошката агенда на државата ја следиме и со зелени енергетски проекти, согласно Европската зелена агенда, односно ја спроведуваме транзицијата од јаглен во еколошки енергенси за производство на електрична енергија.На местата каде што претходно функционираа рудниците за јаглен и загадувачките термоцентрали сега се градат фотонапонски електрани и се редат ветерни паркови и гасни електро-централи,“ рече премиерот.
Градоначалникот на Град Скопје, Петре Шилегов на акцијата за расчистување на поранешниот полигон за обука на возачи под Кале, рече дека локацијата не е случајно одбрана бидејќи изминативе три години била предмет на анализа на Град Скопје и УНДП како дел од проектот „Отпорно Скопје“ и изготвени се две студи: Студија за озеленување и пошумување на подрачјето на Град Скопје и Студија за ерозија и акциски план на Град Скопје.
„Оваа локација-ридот на Кале е една од најкритичните точки на градот во смисла на ерозија и согласно таа студија во изминативе две и пол години, Градот Скопје во соработка со УНДП има засадено над 11.500 садници со цел спречување на ерозивните процеси. Сакам да најавам дека оваа локација во иднина ќе биде во фокус на градот во смисла на уредување на јавниот простор,“ рече Шилегов.
Тој најави дека овој простор треба да премине во организирано паркирање, но и да се изградат нов памптрак полигон, скејт парк, кошаркарски игралишта со цел овој простор кој во минатото беше сериозно девастиран и заборавен од градските власти да го ставиме во употреба на скопјани.
„Со уредувањето на овој простор, кој локациски се наоѓа во непосредна близина на Градскиот парк, и воведување организирано паркирање планираме да го направиме многу подостапен пристапот до Градскиот парк, забавниот парк, Зоолошката градина. Во оваа прилика сакам да апелирам до скопјани, особено граѓаните што доаѓаат од Аеродром, Ново Лисиче, Бутел и Чаир наместо да одат да паркираат пред ЗОО Скопје да го користат овој простор, којшто сега е слободен за паркирање, исчистен и релативно безбеден,“ додаде Шилегов.
Премиерот Заев најави дека Шилегов, повторно е нивен фаворит за градоначалник на претстојните локални избори.