Владата на денешната седница донесе Предлог на закон за ослободување од плаќање на дел од придонесите од задолжително социјално осигурување, којшто има за цел да доведе до зголемување на платите, информираат од владината прес-служба.
„Со овој закон, како што е образложено од предлагачот, Министерството за труд и социјална политика, се стимулира зголемување на платите на вработените, како и намалување на трошоците за работната сила на работодавачите, со тоа што се прави законско регулирање на мерка за ослободување од плаќање на дел од придонесите од задолжително социјално осигурување“, стои во владиното соопштение.
Целта на Предлогот на законот е поттикнување на работодавачите да исплаќаат плата во повисок износ, намалување на даночната евазија и неформалната економија, а со цел подобрување на економскиот стандард на вработените и поттикнување на економскиот развој на Република Северна Македонија, информираат од владата.
