Следниот блок аудиоснимки што денеска ги објави лидерот на СДСМ, Зоран Заев, според неговите зборови покажуваат како се договарале телевизиски содржини кои требало да обезбедат предност за ВМРО-ДПМНЕ.
Во една од снимките, според Заев, се слуша како сопственикот на „Канал 5“, Емил Стојменов, и Мартин Протоѓер разговараат за емисија што треба да се емитува. Протоѓер му вели да ја пуштат емисијата со лош тон, а Стојменов тврди дека ако треба, ќе ја исклучат и струјата во телевизијата.
Во следниот разговор што го објави Заев, зборуваат Протоѓер и Влатко Мијалков за подготовка на интервју кое треба да оди на телевизија „Сител“.
Во третата аудиоснимка од овој блок, Драган Павловиќ-Латас зборува со Зоран Коњановски за интервјуто кое Греувски го дава на телевизија „Сител“. Коњановски му вели дека станал „министер за напад“.