Денеска рочишта за „Насилството во општина Центар“, „Тенк“ и за смртта на малата Тамара


Скопје, 17 септември, 2018 - 10:26 (META) 

Во Кривичниот суд денеска треба да се одржат рочишта за предметите „Насилство во општина Центар“ и раздвоената постапка за „Тенк“ на Специјалното јавно обвинителство.

На претходните рочишта на поранешната министерка за внатрешни работи Гордана Јанкулоска во раздвоената постапка за случајот „Тенк“ на СЈО, беа изнесувани материјални докази и сослушани сведоци, кои на некој начин биле вклучени во јавната набавка на блиндираното возило „мерцедес“ во вредност од 600 илјади евра во 2012 година.

Во предметот „Насилство во Центар“ обвинети се поранешниот премиер Никола Груевски, поранешниот министер за транспорт и врски Миле Јанакиески, екс советничката на ВМРО-ДПМНЕ Даниела Рангелова и уште осум други лица.

На претходните рочишта за овој предмет, вина признаа четвртообвинетиот Томислав Лазаров и петообвинетиот Јордан Ристевски и добија условни казни.

Во Кривичниот суд Скопје денеска е закажано судење и за смртта на малата Тамара Димовска од Велес, која во 2015 година почина чекајќи операција на рбетот во странство.

Со обвинение за „несовесно работење во службата“ Основното јавно обвинителство поднесе кривични пријави против поранешната директорка на Детската клиника Аспазија Софијанова како член на второстепената комисија и поранешните директори на Фондот за здравствено осигурување на Република Македонија (ФЗОМ), Маја Парнарџиева – Змејкова и Џемали Мехази.


Кривичен суд одговори на обвинувањата од адвокатите и Катица Јанева


Скопје, 30 август, 2018 - 17:08 (META) 

Основниот суд Скопје 1, познат и како Кривичен суд, денеска одговори на обвинувањата од адвокатите на обвинетите во судските процеси во кои обвинението го застапува Специјалното јавно обвинителство (СЈО), но и на вчера кажаната критика од специјалната обвинителка Катица Јанева дека не се закажуваат доволно рочишта за овие предмети.

Адвокатите се бунеа дека многу често се закажуваат рочишта, а некои и се поклопуваат, па не може да учествуваат на сите судења. Така, на денешното судење на Гордана Јанкулоска во случајот „Тенк“, и двајцата нејзини адвокати, Боро Тасевски и Сања Алексиќ, не беа на почетокот на рочиштето, бидејќи биле на судењето за „Насилство во Општина Центар“.

– Или да се јави еден адвокат, или ќе ги казнам и двајцата со висока парична казна и ќе ви назначам бранител по службена должност – и рече судијката Добрила Кацарска на Јанкулоска.

Дваесетина минути подоцна адвокатите дојдоа во судницата.

И поранешниот премиер Никола Груевски не се појави во Апелацискиот суд, каде требаше да се разгледува неговата пресуда во случајот „Тенк“, оти и тој и адвокатите биле на судењето за „Насилство во Општина Центар“.

Од судот порачаа дека судиите ги почитуваат правата на странките, а распоредите се прават со многу напор, за да бидат усогласени јавните расправи.

„Ја информираме јавноста дека судиите при Основниот суд Скопје 1 – Скопје во целост ги почитуваат првата на странките како во овие така и во сите други предмети и со крајни напори се прават прецизни и усогласени распореди на закажаување на главните расправи се со цел да се овозможи доволно време на обвинетите и нивните бранители квалитетно да ја подготват својата одбрана, доследно да се почитува принципот на еднаквост на оружјата и правото на судење во разумен рок“, порачаа од судот.

Велат и дека е проблем тоа што обвинетите во случаите на СЈО им се суди во неколку процеси, па не може да се закажува јавна расправа во ист ден.

„Дополнителен проблем е што поголем дел од обвинетите имаат по двајца или повеќе бранители, па затоа при насрочување на расправите се внимава на судењето да биде присутен барем еден од бранителите кои ги застапуваат обвинетите“, велат од Судот.

Во однос на критиките од Јанева дека за одредени предмети на СЈО не се насрочуваат доволно расправи, од Кривичниот суд напоменуваат дека само во текот на септември 2018 година, од 20 работни дена, во 19 од нив се насрочени расправи за 16 различни предмети по кои постапува Специјалното јавно обвинителство, а воедно термините се усогласени како би се овозможиле доволно време на одбраната да се подготви.

Во соопштението се напоменува и дека во моментов во судот се постапува по 1.633 други предмети во одделението кривично – полнолетни, како  и 126 други предмети во одделот за организиран криминал и корупција, меѓу кои и предмети со над 30 обвинети од кои дел се во притвор, „и овие предмети не може да се занемарат за сметка на други“.


Нови судски рочишта за „Тотал“ и „Транспортер“


Скопје, 2 јули, 2018 - 9:44 (META) 

Во Кривичниот суд денеска треба да се одржат нови судски рочишта за случаите „Тотал“ и „Транспортер“ на Специјалното јавно обвинителство.

Во „Тотал“ обвинет е новинарот Драган Павловиќ-Латас за затајување на данок во висина од 121.414 евра преку правните лица „Тотал маркетинг”, „Тотал медија центар” и „Медијамакс” и 63.032 евра како физичко лице.

Набавката на опремата за себе ја евидентирал како опрема за фирмите, иако во фирмите немало вработени лица, односно во една фирма имало само еден вработен.

По неколку одложувања поради здравствени и семејни причини на Драган Павловиќ-Латас, судењето за случајот почна на 14 мај годинава.

На обвинителна клупа денеска, исто така, треба да седнат и обвинетите во предметот на СЈО „Транспортер“.

Поранешниот битолски градоначалник Владимир Талески и уште 20-тина лица во овој случај се товарат за злоупотреба на службената положба во врска со организирањето превоз на ученици во Битола, со што е направена проневера на околу 360.000 евра.


На 22 август започнува судењето за упадот во Собранието од 27 април


Скопје, 28 јуни, 2018 - 16:38 (META) 

Судијката Добрила Кацарска за 22 август во 10 часот го закажа стартот на судскиот процес за случувањата од 27 април минатата година, кога повеќе лица упаднаа во Собранието при што беа повредени пратеници, новинари и граѓани.

„За предметот кој беше оформен по одобрувањето на обвинителниот акт поврзан со настаните од 27 април 2017 година кои се случија во Собранието, ја информираме јавноста дека предметот е насрочен за 22 август во 10 часот. Закажани се вкупно 37 термини за главната расправа за што веќе се изготвуваат наредби за спровод за обвинетите кои се наоѓаат во куќен притвор како и покани за останатите странки во предметот“, стои во соопштението на Основниот суд Скопје 1-Скопје.

Само во август ќе има пет термини за судење, односно ќе се суди на 22, 23, 24, 27 и 31 август, а термини се одредени и за септември, октомври и за ноември.

Со обвинителниот акт се опфатени 30 лица, но само двајца од нив ќе одговараат за помагање, додека другите ќе одговараат за кривично дело „терористичко загрозување на уставниот поредок и безбедноста“, согласно член 313 од Кривичниот законик на РМ.

Меѓу обвинетите се и пратениците Сашо Василевски, Јохан Тарчуловски, Љубчо Димовски, Љубен Арнаудов, но и екс-министерот Митко Чавков, актерот Владо Јовановски, оперскиот пејач Игор Дурловски, режисерот Борис Дамовски.


Нови рочишта за предметите „Титаник 3“ и „Трезор“,


Скопје, 28 јуни, 2018 - 9:56 (META) 

Во Кривичниот суд за денеска се закажани нови рочишта за предметите на СЈО „Титаник 3“ и „Трезор“.

Во предметот „Титаник 3“ обвинети се Ејуп Аљими и Исмет Гури, затоа што како членови на Општинската изборна комисија во Чаир на локалните избори во 2013 година „уништувале изборен материјал“.

Обвинетите на претходните рочишта кажаа дека го разбираат обвинението што го презентира обвинителката Фатиме Фетаи, но оти не се чувствуваат виновни.

Според обвинението, двајцата обвинети со своите дејствија влијаеле директно врз изборниот резултат и, како што е наведено, „имале криминален нагон да ја фалсификуваат изборната волја на граѓаните на Чаир со цел да остварат политичка моќ“.

Во Судот денеска треба да се одржи рочиште и за „Трезор“ во кој обвинети се поранешниот директор на УБК Сашо Мијалков, поранешниот шеф на неговиот кабинет Тони Јакимовски, поранешниот помошник-министер во МВР Небојша Стајковиќ и поранешниот началник на Петтата управа во МВР Горан Грујевски, кој се наоѓа во Грција.

Тие се товарат за злоупотреба на службената положба и овластувања и предизвикување штета на Буџетот во висина од 862.045 евра за набавката на електронско-комуникациска опрема за потребите на Петтата управа при УБК и обука за нејзино користење од фирма од Велика Британија.


Груевски ја бара единствената камера, досега зафатена со снимање на „Диво Насеље“


Скопје, 6 декември, 2017 - 13:30 (META) 

Најголемиот суд во државата, Основниот суд Скопје 1, каде дневно се одржуваат десетици судења, има само една камера и дополнителна опрема за визуелно-тонско снимање на рочиштата, како што пропишува Законот за кривична постапка (ЗКП).

Поради ова, за најголем дел од рочиштата нема видео-тонски запис, а денеска немањето услови за снимање во судницата беше причината поради која се одложи и првото рочиште за случајот „Траекторија“.

Одбраната на обвинетите, Никола Груевски, Владимир Пешевски, Миле Јанакиески, ексдиректорот на Агенцијата на државни патишта Љупчо Георгиевски, побара од судот да обезбеди услови за снимање на рочиштата, како што налага ЗКП, а судијата Горан Бошевски се согласи и рече дека тие ќе бидат обезбедени за следното рочиште.

„Тонскиот или визуелно-тонскиот запис од одржаната расправа е дел од судскиот предмет кој се води во автоматизираниот компјутерски систем за управување со судските предмети (АКМИС). Тонскиот или визуелно-тонскиот запис не смее да се објавува, емитува и користи за намени и за цели надвор од кривичната постапка. Странките и бранителот имаат право по одржувањето на главната расправа да добијат копија од тонската или визуелно-тонската снимка или во рок од три дена препис од стенографскиот записник, во печатена или електронска форма. Копија од снимката се доставува веднаш, а најдоцна во рок од 24 часа“, стои во членот 374 од ЗКП.

Немањето услови за тонско и визуелно-тонско снимање беше нотирано од судиите и на претходни рочишта од други судски процеси, меѓу кои и тие за случаите отворени од Специјалното јавно обвинителство.

Таков беше случајот со дел од рочиштата за случаите „Тврдина 2“ и за насилствата пред Општина Центар од мај 2013 година, познат во јавноста како „Шамари“, каде судијките Лидија Петровска и Татјана Михајлова нотираа дека расправите не се снимаат бидејќи единствената камера во судот е зафатена за снимање на судењето за случајот „Диво Насеље“. Но, тогаш ова не беше причина за одложување на рочиштата.

Инаку, ЗКП предвидува дека „кога не постојат технички услови за тонско или визуелно-тонско снимање на текот на главната расправа, претседателот на судечкиот советот може да нареди за текот на главната расправа да се води стенографски записник“.

Сепак, Кривичниот суд во Скопје, но и другите судови во земјава, немаат опрема за водење стенографски записник, туку во моментов тој се води дактилографски.

Неизбежен дел од текот на секое рочиште за случајот „Шамари“ е судијката Татјана Михајлова да бара од обвинителката на СЈО, Фатиме Фетаи, да не брза и да зборува полека за да може записничарот да го фати секој збор.

Снимањето на рочиштата беше воведено со донесувањето на новиот Закон за кривична простапка во 2010 година, а кој почна да се применува од јануари 2013 година.


Денеска три судења: За насилствата во Собранието, за „Тврдина 2“ и за „Маѓар Телеком“


Скопје, 23 мај, 2017 - 9:42 (META) 

Во Кривичниот суд за денеска се закажани три судења – за насилствата во Собранието на 27 април, за случајот на СЈО „Тврдина 2“ и за „Маѓар Телеком“.

Првото рочиште за нападот во Собранието кои се случи на 27 април при што беа повредени неколку пратеници, новинари и граѓани беше одложено затоа што од куќен притвор не беше спроведен првообвинетиот Ангеле Зафировски, кој е еден од деветемината обвинети за „учество во толпа што ќе изврши кривично дело“.

Претходното рочиште за судскиот процес за случајот „Тврдина 2“ исто така беше одложено бидејќи во судницата не се појавија првообвинетиот Горан Грујовски, поранешен началник на петтата управа на УБК, и неговиот адвокат, Никола Додевски.

Бранителите на другите обвинети до судот доставија медицинска документација, според која, како што рекоа, Грујовски е на боледување поради „сериозно влошена здравствена состојба“.

На ова реагираа обвинителите на Специјалното јавно обвинителство, Гаврил Бубевски и Трајче Пеливанов, кои истакнаа дека ќе извршат дополнителни проверки за да утврдат дали Грујовски навистина не може да доаѓа на рочиштата.

Обвинителот на СЈО, Пеливанов, наведе дека имале и претходни искуства кога Грујовски и други обвинети и осомничени во случаите што ги води СЈО, не доаѓале на распити во СЈО и на закажаните рочишта и дека токму во тие периоди тие биле на боледување.

Третото судење закажано денеска во Кривичен суд е за „Маѓар Телеком“ во кој обвинетите Атила Сендреи, Ролф Плат и Золтан Кишјакус, кои се товарат за злоупотреба на службената положба, шест години се недостапни за органите на прогонот, Поранешните директорина Маѓар телком, Елег Штрауб и Андрас Балог, се спогодија да платат парични казни и добија и петгодишна забрана за вршење дејност како директори или вработени во сите акционерски друштва, во процесот што се водеше пред Окружниот суд во Њујорк.


Местенка, тероризам или криминал: Две години без одговори за акцијата во Диво Насеље


Скопје, 9 мај, 2017 - 8:01 (META) 

И по точно две години  прашањата што се наметнаа уште додека Диво Насеље во Куманово сè уште мирисаше на барут и на чад од дводневната борба помеѓу специјалните полициски сили и вооружената група, остануваат неодговорени. Одговори на клучните дилеми нема ниту по една и пол година судски процеси:

  • Кои биле вистинските мотиви и цели на кумановската група?;
  • Дали станува збор за чисто криминална или за терористичка организација?;
  • Доколку се терористи, зошто не излегоа со коминике и со некакви политички барања?;
  • Ако безбедносните служби подолго време ја следеле групата и навреме известиле за неа, како што тврди Агенцијата за разузнавање, зошто не бил превениран судирот во Куманово и претходно нападот на караулата Гошинце (на 21 април 2015)?;
  • Кое е (и дали имала) кодното име на полициската акција во Куманово?;
  • Дали во настаните биле вмешани странски служби?

Судскиот процес за настаните во Диво Насеље од 9 и 10 мај 2015 година почна на 9 февруари минатата година. Обвинителството за гонење организиран криминал и корупција поднесе обвиненија против 37 лица (29 уапсени непосредно по борбите со полицијата и 8 кои подоцна беа обвинети како логистика на групата), за кои тврди дека има доволно докази дека се виновни за тероризам и за терористичка организација, и толку.

Обвинетите ги отфрлија тврдењата на обвинителството и сите се изјаснија дека не се чувствуваат виновни за кривичните дела што им се ставаат на товар, а дел од нив рекоа не биле дојдени во Куманово да војуваат и дека биле искористени за политички цели.

„Дури и малите деца знаат дека не сме терористи и дека не дојдовме во Куманово да војуваме. Бевме искористени за политички цели и не сме ниту први, ниту последни што сме искористени за тоа“, изјави Насуф Бекири, еден од обвинитите во случајот „Диво Насеље“, на 11 февруари 2016 година.

Адвокатот на дел од обвинетите, Насер Рауфи, во изјава за медиумите, по првото рочиште во февруари минатата година, рече дека се убедени дека со нападот на караулата Гошинце (кон крајот на април 2015) и со настаните од Диво Насеље, се сакаше да се дефокусира јавноста од прислушуваните разговори, кои истата година почна да ги објавува СДСМ.

Првообвинетиот во случајот, Сами Укшини, алијас командант Соколи, на 17 февруари оваа година, во својот исказ пред судот изјави дека политичките проблеми на Албанците и неимплементирањето на Охридскиот рамковен договор биле причината поради која кумановската вооружена група дошла во Македонија и во Диво Насеље и дека намерата била да ги повикаат новинарите, односно да свикаат прес-конференција, на која јавно ќе кажат дека ако не се реализира Рамковниот договор, работите во Македонија ќе се вратат во 2001 година.

Речиси половина од судскиот процес за настаните во Диво Насеље се одвиваше зад затворени врати, односно јавноста беше исклучена од рочиштата на кои се сослушуваа заштитени сведоци, меѓу кои и припадници на полициските сили. Не е познато дали пред судот искази дале тогашните први луѓе на Министерството за внатрешни работи (Гордана Јанкулоска), на Управата за безбедност и контраразузнавање (Сашо Мијалков), на Бирото за јавна безбедност (Митко Чавков) и на Агенцијата за разузнавање (Наќе Чулев).

Мијалков и Јанкулоска си поднесоа оставки два дена по настаните во Диво Насеље, изнудени или не – остана мистерија.

Пратеникот во Собранието, Оливер Спасовски, вчера одговарајќи на новинарско прашање изјави дека новата влада ќе спроведе нова истрага за расчистување на сите дилеми околу настаните во Диво Насеље:

„…Ако добро ја гледате програмата на идната влада на Социјалдемократскиот сојуз, таму стои и тоа дека мора да има нова детална истрага што ќе укаже на сите апекти од настаните во Куманово. Тоа мора да биде на еден транспарентен начин, да се расчистат сите можни дилеми“.

Во настаните во Диво Насеље загинаа осум припадници на специјалните полициски единици, а 37 беа повредени. Терористичката група броела четириесетина членови, од кои во борбите со полицијата убиени беа 10 членови. По борбите, на полицијата ѝсе предадоа 28 терористи. Како водачи на групата се идентификувани Мирсад Ндрецај (убиен) , Бег Ризај (убиен), Мухамед Красниќи, Сами Укшини и Деме Шеху.


„Тврдина 2“ не се снимаше бидејќи единствената камера била на „Диво Насеље“


Скопје, 5 мај, 2017 - 14:46 (META) 

Денешното рочиште од судскиот процес за случајот „Тврдина 2“ не се снимаше, како што налага членот 374 од Законот за кривична постапка, бидејќи, како што објасни судијката Лидија Петровска, камерата била зафатена за снимање на судењето за случајот „Диво Насеље“, кое во исто време се одржуваше во големата сала на Врховниот суд.

– Видео-тонско снимање нема да се врши бидејќи камерата, која е една, се користи во предметот на организиран криминал во јавноста познат како „Диво Насеље“ – рече Петровска.

Инаку, во средата оваа недела, на рочиштето за насилствата пред Општина Центар од јуни 2013 година, односно т.н. случај „Шамари“, обвинителот на СЈО, Гаврил Бубевски, уште еднаш побара од судот на СЈО да му биде доставена аудио-визуелната снимка од првото рочиште. На ова судијката Татјана Михајлова рече дека судот нема опрема за аудио-визуелно снимање на рочиштата, а снимањето што сега судот го врши е за негови потреби.

Бубевски во врска со ова пред новинарите изјави дека снимањето во судот не е „домашно видео“ и дека законот за кривична постапка јасно пропишува кои рочишта треба да се снимаат.

„Тонскиот или визуелно-тонскиот запис од одржаната расправа е дел од судскиот предмет кој се води во автоматизираниот компјутерски систем за управување со судските предмети (АКМИС). Тонскиот или визуелно-тонскиот запис не смее да се објавува, емитува и користи за намени и за цели надвор од кривичната постапка. Странките и бранителот имаат право по одржувањето на главната расправа да добијат копија од тонската или визуелно-тонската снимка или во рок од три дена препис од стенографскиот записник, во печатена или електронска форма. Копија од снимката се доставува веднаш, а најдоцна во рок од 24 часа“, стои во членот 374 од ЗКП.

Кон средината на декември минатата година, на социјалните мрежи протече фотографија од подготвителното рочиште за судењето за „Тврдина 2“. Фотографијата се претпоставуваше дека е направена од аголот во судницата каде се наоѓа судската камера со која се снимаат рочиштата.

Сепак, и покрај интресот на медиумите и на јавноста, остана енигма кога, како и од кого протекла фотографијата.


Груевски утре на суд за „Шамарите“, Заев в четврток за „Поткуп“, в петок – „Тврдина 2“


Скопје, 2 мај, 2017 - 14:04 (META) 

По пауза од еден и пол месец, утре и задутре на обвинителна клупа, еден по друг, повторно треба да седнат лидерите на двете најголеми политички партии, ВМРО-ДПМНЕ и СДСМ, Никола Груевски и Зоран Заев, во случаите што се водат против нив во Кривичниот суд во Скопје.

Рочиштата против Груевски и Заев доаѓаат една недела по хаосот и насилствата во Собранието на Република Македонија. Еден од случаите, односно оној за кој е обвинет лидерот на ВМРО-ДПМНЕ, заедно со уште 13 лица, се однесува на слично вакво насилство (не толку крваво) – тоа пред Општина Центар од 2013 година.

Од Кривичниот суд денеска не можеа да кажат дали утре и задутре ќе се одржат рочиштата или, пак, ќе бидат одложени. Оттаму не можеа да кажат ниту дали некоја од странките барала одложување на рочиштата.

На официјалната интернет-страница на Основниот суд Скопје 1, односно новиот „Судски портал“, во календарот на рочиштата против Груевски и Заев стои дека рочиштата се закажани:

– На 3 мај, во 10 часот, во судница 1 треба се одржи рочиштето за случајот „Шамари“ против Никола Груевски и уште 13 обвинети за насилствата пред Општина Центар. Судијка во случајот е Татјана Михајлова. Претходното рочиште, кое се одложи, беше на 10 март, но во судницата не се појавија ниту Груевски, ниту другите обвинети. Објаснувањето на адвокатот на Груевски, Никола Додевски, беше дека неговите клиенти не се појавиле бидејќи има решение со кое Советот на јавни обвинители бара промена на обвинителот во случајот, односно на обвинителката на СЈО, Фатиме Фетаи;

– На 4 мај, во 10 часот, во судница 1 е закажано рочиштето против лидерот на СДСМ, Зоран Заев, за случајот „Поткуп“, а судијка е Дијана Груевска-Илиевска. Претходното рочиште се одржа на 3 април, на кое судијката Дијана Груевска-Илиевска го прифати барањето на одбраната на Заев, Обвинителството за организиран криминал и корупција да им достави копии од доказите во случајот;

– На 5 мај, закажано е рочиште за случајот „Тврдина 2“ против поранешниот началник на петтата управа, Горан Грујовски, и уште шестмина вработени во Управата за безбедност и контраразузнавање (УБК). Претходното рочиште беше одложено бидејќи судијката Лидија Петровска, позната како „сваровски-судијката“, беше на боледување. Обвинителката на СЈО, Ленче Ристоска, тогаш изјави дека успеале да добијат решенија за декласификација на голем дел од доказите, како што бара Петровска.

Ниту за еден од овие три случаи досега не е почнат официјален судски процес, а досегашните рочишта редовно се одложуваат.