Основното јавно обвинителство Битола поведе постапка против 35 годишен жител на селото Долно Оризари, кој е осомничен за кривично дело – Предизвикување општа опасност од член 288 став 1 од Кривичниот законик, соопштија денеска во Обвинителството.
„На 2 март, во вечерните часови, осомничениот влегол во казино на улицата „Лазо Трповски“ во Битола, се качил на спратот од објектот каде што имало и други лица, па истурил бензин врз шест слот-машини и ги запалил. Со тоа предизвикал пожар кој зафатил дел од инвентарот и предизвикал значителна опасност по животот и телото на луѓето и по имотот од големи размери“, наведено е во соопштението.
Оттаму додаваат дека по предлог од надлежниот јавен обвинител, судијата на претходна постапка од Основниот суд во Битола, определил мерка притвор во траење од осум дена за осомниченото лице.
