Предлог-буџетот за 2021, кој министерот за финансии Фатмир Бесими денеска го достави до претседателот на Собранието, Талат Џафери има три цели: поддршка на здравството и на економијата и системски реформи во правосудството и евроатлансите интеграции.
„Ова ќе се постигне преку стратегијата за економско заздравување и забрзан раст. Првиот столб е справување со ковид-кризата, вториот е одржлив и зелен раст, третиот е конкурентност на приватниот сектор и четвртиот човечки капитал како и политиките за фискална консолидација на среден рок,“ се вели во соопштението на Министерство за финансии.
Новина во овој буџет е што воведува нов концепт на среднорочно планирање – односно петгодишна рамка за капиталните проекти, растот и дефицитот.
„Со тоа ќе се зајакнат и капацитетите за планирање, но и на реализација на таргетите. Исто така, ќе се воспостават и механизми кои ќе го мерат импактот на проектите врз економијата, како и систем на наградување и казнување на оние кои имаат добра реализација и на оние кои потфрлиле,“ се додава во соопштението.
Од Министерство за финансии велат дека предлог-буџетот за 2021 година се доставува до Собранието навремено, дури и порано од рокот предвиден со буџетскиот процес.
„Министерот за финансии Бесими на средбата посочи дека во насока на самостојноста на буџетот на Собранието – предлогот доставен од Собранието е инкорпориран во Предлог-буџетот за 2021, како што е даден од страна на законодавното тело без никакви интервенции. Бесими истакна дека со буџетот за 2021 година се прават системски измени кои ќе постават основа за постратешко, подолгорочно и потранспарентно дејствување на јавните финансии во иднина, односно СМАРТ финансии,“ велат од Министерство за финансии.
Бесими очекува една демократска расправа во Парламентот за предлог-буџетот, една дискусија која ќе биде конструктивна и ќе нуди решенија и оптимално дејствување. Бесими истакна дека во време кога целиот свет и глобалната економија се соочуваат со една од најголемите кризи, потребни се одлуки и решенија кои на прво место ќе го ставаат здравјето на граѓаните, но и економијата. Тој додаде дека е ова е време кога исклучително е важно да следиме претпазливо што се случува, да сме агилни – да дејствуваме брзо, но и да размислуваме стратешки на долг рок.
