Поради малверзации и неизвршување службена должност во врска со две парцели за хотел и за Шпанските скали во строгиот центар на Скопје, но и за уште една поголема парцела за хотел, Основното јавно обвинителство за гонење организиран криминал и корупција, по добивањето 11 кривични пријави од Одделот за сузбивање на организиран и сериозен криминал при МВР, почна истрага.
За сите е побаран притвор.
Цел на истрагата се поранешниот министер за транспорт и врски Миле Јанакиески, петмина вработени во Министерството за транспорт и врски, поранешна државна правобранителка, една вработена во Катастар, двајца вработени и бизнисмен. Десетмина од нив беа уапсени утрово. Јанакиески пред суд е донесен од домашниот притвор кој го доби поради сомневање дека е дел од организаторите на насилниот упад во Собранието на 27 април.
Се товарат за злоупотреба на службената положба и овластување и за несовесно работење, во вкупно нанесена штета на државниот буџет од 2,64 милиони евра.
Јанакиески и петмината вработени во Министерството за транспорт и врски, потпишале договори за продажба на двете парцели едната од 4.090 квадратни метри, а втората од 1.046 квадратни метри, но тоа било незаконски, а потоа не го следеле исполнувањето на условите од договорите и анекс-договорите и не го вратиле земјиштето во државна сопственост.
Вториот дел од истрагата е за два договори за државно земјиште со површина од 8.745 квадратни метри, кое било продадено за 71 денари за квадрат, како и уште една парцела од 13.765 квадратни метри за хотел.за хотел.
Покрај побараниот притвор, Обвинителството за организиран криминал доставило и предлог за мерки за обезбедеување на имот до износот на штетата на државниот буџет.
