Премиерот и целата влада до четврток претпладне ќе бидат во оставка, што ќе остави законски можности да се изгласа техничката влада во законски предвидениот рок – до пред полноќ в недела, порача денеска претседателот на Владата, Димитар Ковачевски.
Тој појасни дека нема да има потреба од поединечни оставки на министрите, бидејќи со оставката што ќе ја поднесе премиерот Ковачевски, целиот владин кабинет ќе биде во оставка.
Освен владата, в четврток оставка треба да поднесе и претседателот на Собранието, Талат Џафери, кој ќе биде технички премиер на Македонија во 100-те дена пред парламентарните избори в мај.
На собраниската седница ќе треба да се избере и нов претседател на Собранието, а тоа ќе биде координаторот на пратеничката група на СДСМ Јован Митрески.
Изборот на владата на Џафери треба да биде направен викендов, најдоцна до полноќ на 28 јануари.
