„Во моментов има 110 македонски граѓани кои се во Сирија, 69 се вратени, а досега 25 го загубиле животот. Наместо полицијата да ги користи ресурсите за следење и за превенирање на можни непосакувани акти од такви лица, нашите ресурси се на границата, да се справуваат со мигрантската и бегалска криза“, изјави претседателот на државата, Ѓорге Иванов, во синоќешното интервју за телевизијата „Канал 5“.

Коментирајќи ја состојбата на јужната граница, по инцидентите од викендот, кога група мигранти се судрија и фрлаа камења кон полицијата кај кота 59, Иванов оцени дека таа е со висок ризик, бидејќи станува збор за насилни акти врз полицијата и врз армијата.

На средбата со германската канцеларка, Ангела Меркел, македонскиот претседател соопшти дека ја запознал со информациите што ги има од надлежните институции на Македонија, дека се зголемува бројот на мигранти што доаѓаат од Африка и од Азија, додавајќи дека има денови кога на границата има повеќе од 1.000 мигранти од Мароко, Бангладеш и од Иран.

„Тоа беше новина бидејќи тие ги имаат информациите за тоа што влегува во коридорот и кој пристигнува на крајните дестинации, а една од земјите кои се крајна дестинација е Германија. Од Меркел добив уверување дека Македонија мора да има поддршка не само од земјите што се на линијата на коридорот, туку и од сите членки на Унијата. Ние баравме, пред сè, опрема за да можеме да вршиме регистрација на сите бегалци што влегуваат на наша територија и да имаме контрола на границата. За жал, таа помош сè уште не е добиена. Навистина загрижувачка е информацијата што беше дадена од француското обвинителство дека двајца од учесниците во терористичкиот акт во Париз поминале низ нашата територија“, рече Иванов.