Претседателот на Република Македонија, Ѓорге Иванов, оствари средба со членовите на владиниот тим за странски инвестиции, со кои разговараше за идеи, мислења и за инцијативи за во рамките на неговите дипломатските активности да се засили економската агенда.
На средбата присуствуваа заменик-претседателот на Владата задолжен за економски прашања, Владимир Пешевски, министрите без ресор задолжени за привлекување странски инвестиции, Џери Наумоф, Горан Мицковски, Веле Самак и Фуркан Чако, како и директорот на Дирекцијата за технолошки индустриски развојни зони, Виктор Мизо.
Претседателот Иванов изразил подготвеност за поддршка и за помош на владиниот тим во насока на воспоставување контакти со одредени земји кои се потенцијални инвеститори во Република Македонија, обезбедување информации за пристап до меѓународните пазари и олеснување на извозно ориентираните компании во наоѓање странски деловни партери.
Иванов информирал дека ќе оствари слична средба и со претставниците на македонската бизнис-заедница, чии компании се извозно ориентирани, за да ги слушне и нивните потреби и интереси, по што кабинетот на претседателот ќе пристапи во реализација на договореното, со подготовка на посети на држави кои се одредени како приоритетни.