Владата нема да биде нем сведок на нефер или неетички практики во трговијата кои одат директно на штета на семејниот буџет на граѓаните, порачал вицепремиерот за економски прашања, координација на економските ресори и инвестиции, Фатмир Битиќи. на денешниот работен состанок со Владимир Наумовски, претседател на Комисијата за заштита на конкуренцијата.
На состанокот се зборувало за ценовните движења во малопродажната мрежа на прехранбени продукти и постоењето на можности за присуство на трговски практики кои освен што ја нарушуваат слободната пазарна економија и конкуренцијата, носат и директна штета на граѓаните.
Битиќи истакнал дека Владата нема да биде нем сведок на нефер или неетички практики во трговијата кои одат директно на штета на семејниот буџет на граѓаните.
„Постојат реални околности кои укажуваат на вештачко фиксирање на цените на високо ниво како резултат на координирано договарање помеѓу трговците на цените на одредени производи, со што го контролираат и ограничуваат нивното слободно пазарно формирање, а со цел зголемување на нивната добивка. Оваа пракса оди директно на штета на граѓаните и производителите, и ова нема да го дозволиме“, нагласил вицепремиерот Битиќи.
Заеднички на состанокот беше констатирано дека е потребно отпочнување на постапки од страна на надлежните институции, вклучително и на Комисијата, за истражување дали постојат одредени законски повреди и злоупотреби кои доведуваат до нефер зголемување на крајните цени за потрошувачите.
