Владата на Велика Британија смета дека Иран имал улога во инцидентот во базата на Кралските воздухопловни сили (РАФ) во Ферфорд, кој резултираше со апсење на петмина мажи, кои потоа беа пуштени на слобода со кауција, изјави премиерот Енди Бурнам.

„Постојат силни индиции дека Иран имал улога во она што се случи викендов во базата во Ферфорд“, изјави тој за Би-би-си. Тој не соопшти дополнителни детали.

Иран реагираше преку министерот за надворешни работи Абас Аракчи, кој изјави дека британскиот лидер бара на погрешно место.

„Можам да го потврдам ставот на Иран дека самото пуштање на слобода на наводни терористи кои работат за странски држави, всушност, кажува сè“, напиша тој на социјалните мрежи.

На прашањето зошто осомничените биле пуштени со кауција – одлука што отворено ја доведе во прашање претседателот Доналд Трамп – Бурнам инсистираше на тоа дека за нив важеле најстрогите можни услови за кауција.

Говорејќи во Белата куќа во понеделникот, Трамп рече: „Ќе ви кажам, јас би рекол: ’не им дозволувајте кауција‘. Изненаден сум што ги пуштија. Јас не би го направил тоа“. Но, Барнам изјави: „Мислам дека луѓето треба да разберат оти терминот ’пуштени на слобода‘ не значи она што можеби тие го мислат. Тоа, секако, е под најстроги можни услови за пуштање со кауција.

„Надлежните органи го држат ова прашање под најцврста контрола и најбуден надзор, и во тоа можам да ве уверам.“
Коментарите на Барнам уследија откако американскиот државен секретар Марко Рубио во понеделникот изјави дека инцидентот во базата на Кралските воздухопловни сили во Ферфорд јасно укажува на вмешаност на странски актер.

Во интервју за „Фокс њуз“ во понеделникот, Рубио рече: „Мислам дека тоа нè соочува со реалноста, а таа е дека имаме работа со елементи во светот – како на пример во случајот со Иран – кои отворено се закануваат дека ќе ги нападнат американските интереси на глобално ниво“.

Барнам изјави дека владата цела недела разговарала со колегите во САД за да објасни што се случува и како се одвиваат работите, како и дека има целосна доверба во начинот на кој британските безбедносни служби постапуваат во овој случај.

„Ќе соопштиме повеќе детали во соодветно време, но можеме да потврдиме дека сметаме оти Иран имал улога во ова“, изјави тој за Би-Би-Си.

„Секако, станува збор за сложена и сериозна полициска истрага што сè уште трае, а исто така тесно соработуваме со нашите колеги во Соединетите Американски Држави“, додаде Барнам.

Коментарите на Барнам уследија откако се дозна дека еден од петтемина мажи сам го повикал бројот за итни случаи (999) пред групата да биде уапсена.

Петтемина мажи беа уапсени во раните утрински часови во неделата, откако полицијата добила дојава за три сомнителни возила во Велфорд, село што се наоѓа непосредно источно од базата. Сите тие се државјани на Обединетото Кралство на возраст меѓу 23 и 25 години. Четворица од нив живеат во Вестминстер, а еден во Камден; претресите на нивните домови се веќе завршени.

Мажите беа пуштени на слобода со кауција, потег што полицијата го опиша како истражна одлука заснована на искуство и стратегија. Од полицијата соопштија дека при претресот на комбињата биле пронајдени одредени количества бензин, но не и експлозивни направи. Базата на Кралските воздухопловни сили со децении се користи од страна на американските воздухопловни сили како истурена оперативна локација.