Претседателот на Врховниот суд Јово Вангеловски денеска изјави дека очекува во текот на денот да биде објавена одлуката по жалбите за притворите на пратениците и другите осомничени за настаните во Собранието од 27 април минатата година.
– Врховниот суд ќе ја објави одлуката веднаш штом ќе биде донесена – потврди Вангеловски.
Адвокатите на осомничените кои испратија повеќе од 15 жалби велат дека судот неосновано го гази законскиот рок и ја одолговлекува целата процедура.
Апелираат до врховните судии да се донесе одлука што побрзо, бидејќи како што велат, тоа е клучно за процесот да се придвижи кон побрз епилог.
Одлуката на Врховен ја чекаат и оние што се во Шутка, но и осомничените во куќен притвор.
Меѓу обвинетите кои се жалат пред Врховниот суд се поранешниот министер за внатрешни работи Митко Чавков и пратениците Крсто Муковски и Сашо Василевски, кои се во притвор, како и пратеникот Љупчо Димовски и оперскиот пејач Игор Дурловски кои се во куќен притвор.