Германската канцеларка Ангела Меркел денеска одлучно ги отфрли апелите да се ревидира политиката за прифаќање мигранти во Германија по нападите што во последните денови ги извршија бегалци.
– Џихадистите сакаат да ја доведат во прашање нашата спремност да ги дочекаме луѓето во неволја. Ние одлучно се спротивставуваме на тоа – рече Меркел на прес-конференција во Берлин.
Политиката на отворени врати за бегалци и за мигранти на Меркел повторно е мета на критики во Германија, каде владее напната атмосфера по четирите напади во последните седум дена, од кои за два одговорноста ја презеде Исламска држава.
– И денеска сум уверена, како и претходно, дека ќе успееме во историското искушение – порача германската канцеларка.
Таа рече дека „Германија останува на своите принципи“ во давање прибежиште на тие што се во неволја.
Канцеларката рече дека намерата на напаѓачите била да шират страв и омраза меѓу културите и верите и додаде дека властите ќе направат сè за да расветлат кој стои зад „варварските“ напади.
