По повод јубилејното издание на фестивалот „Прво па женско“, на 31 август во Младинскиот културен центар (МКЦ) ќе се одржи концерт во чиј фокус се жени кантавторки – Јоана Ристеска, Марија Каева, Сара Ренар и Теа Шалдева/Galatheia.
Ристеска е соло-артистка и инструменталистка од Скопје, која изведува и компонира музика за акустична и електрична гитара и со аналогни техники ја истражува можноста за експанзија на гитарскиот звук кон слоевит, оркеатарски контекст.
Каева е вокална солистка, музичарка и текстописец, која низ долг период од 20 години спорадично ја збогатува македонската поп архива.
Музичкиот стил на Сара Ренар од Загреб најсоодветно се опишува како експериментално-инди-поп мешање на мелодии со електронски и театрални елементи, додека Шалдева е добро позната скопска стотројкашка на која музиката ѝ е единствена постојана страст која ја води на патот до сеопфатно дејстување во тој свет, велат од Фестивалот за феминистичка култура и акција „Прво па женско“.
Фестивалот оваа година потсетува на родовиот јаз на музичката сцена, но пред сè ѝ дава можност на публиката да чуе меланхолични мелодии на емотивниот и политичкиот разум кои ранливо се принесуваат до потсвеста на слушателите.
