СДСМ со апсењето на Сокол Митревски во 4 часот уринава врши тортура врз политичките неистомисленици и продолжува со политичките хајки врз членовите на ВМРО-ДПМНЕ, изјави на прес-конфренција Ивица Коневски од ВМРО-ДПМНЕ.
– Генералот Сокол Митревски, кој беше досегашен градоначалник на Општина Ѓорче Петров, ниту е криминалец, ниту сторил нешто за полицијата да се изживува со него и со неговото семејство на ваков начин. Ова е само продолжување притисокот што го врши СДС и понижување на Македонија и на сè што е македонско, и тоа преку државните институции кои се користат како средство за пресметка со политички неистомисленици. Срамно е Митревски да биде јавно понижуван со упад во неговиот дом и да се вознемирува целото негово семејство, а истиот тој упад е организиран од врхушката на СДС, заедно со тие против кои Сокол се бореше во 2001 година – изјави поранешниот градоначалник на општина Аеродром.
Коневски нагласи дека Митревски во 2001 година застанал на браникот на Македонија, дека ѝ има служено на државата и дека се грижел за безбедноста на граѓаните. Според него, апсењето на Митревски е напад врз ВМРО-ДПМНЕ и врз Македонија.
