На предлог на Министерството за финансии Владата денеска го утврди текстот на Предлог-законот за задолжување на Република Северна Македонија со заем кај Европската банка за обнова и развој по Договорот за заем за финансирање на Регионалниот проект за цврст отпад.
„Основната цел на гаранцијата за заем за финансирање на проектот е да го помогне развојот на регионални системи за управување со отпад во Југоисточен, Вардарски, Пелагониски, Југозападен и Полошки регион“, соопшти владината прес-служба.
На денешната седница Владата го утврди и текстот на Предлог-законот за гаранција на Република Северна Македонија на обврските по Договорот за заем за финансирање на ТЕН-Т проектот за автопат од Скопје до границата со Косово, кој ќе се склучи меѓу Европската банка за обнова и развој и Јавното претпријатие за државни патишта.
„Целта на овој Предлог-закон за гаранција е да се обезбеди финансиската поддршка за проектот, односно изградба на втората подделница која се однесува на останатиот дел од автопатот Блаце – Скопје, во должина од околу 10.5км со што, значително ќе се подобри мобилноста и трговската размена, ќе се подобри безбедноста на патот и ќе се скрати времето на патување, ќе се зголемат можностите за социо–економски развој, како на национално, така и на регионално ниво“, соопшти Владата.
Како што доаваат оттаму, заменик-претседателот за европски прашања Бојан Маричиќ и Секретаријатот за европски прашања ќе обезбедат институционална поддршка на имплементацијата на иницијативите и договорите.
![](https://meta.mk/wp-content/uploads/2022/05/17052022_45-ta-sednica-na-vladata_3-scaled.jpg)
На оваа 45 седница Владата ја разгледа и усвои Информацијата за почеток на Стратешки дијалог меѓу Република Северна Македонија и Соединетите Американски Држави.
Координатор на процесот за Стратешки дијалог меѓу Република Северна Македонија и САД ќе биде министерот за надворешни работи Бујар Османи кој на 2 јуни ќе ја предводи делегацијата на Владата на отворањето на процесот во Вашингтон во чиј состав ќе бидат и министерката за одбрана Славјанка Петровска, министерот за економија Крешник Бектеши и министерката за култура Бисера Костадиновска Стојчевска.
„Стратешкиот дијалог претставува подигнување на односите на повисоко ниво со САД и е од особено значајно во контекст на актуелните безбедносни закани. Во рамките на дијалогот ќе бидат опфатени теми од билатералните односи за соработка во економијата, трговијата, образованието, транспортот, енергетиката, климатските промени, демократскиот развој, борбата против корупција, владеењето на правото, како и безбедносните сегменти од соработката, од миграција, борба против тероризам, па се до справување со организираниот и меѓународен криминал“, соопшти Владата.
Како што додаваат, дијалогот ги опфаќа и актуелните безбедносни состојби, соработката на двете земји како НАТО партнери, аспирациите на Северна Македонија за зачленување на ЕУ, претстојното претседавање на земјава со ОБСЕ, заложбите во рамки на Самитот за демократија на претседателот Бајден и други теми од интерес.