За жал, тоа што во развиените земји е долга традиција, кај нас се уште е во почетните фази од развојот, рече претседателот Стево Пендаровски пред преставниците на бизнис заедницата во Скопје при синоќешното возобновување на „Клубот на одговорни бизниси“ кој има за цел да го зголеми донирањето. Навистина е потребна сета можна поддршка на овие процеси, додаде Пендаровски.
Тој рече оти верува дека целите на проектот „Партнерства за донирање“ се остварливи. Тие опфаќаат раст на нивото и опфатот на донирањето од страна на корпорациите и поединците, пониска зависност од странски донатори и поттик за хуманите поединци. Пендаровски ја посочи и целта бизнисите да наменат барем 2 отсто од годишниот обрт за развојот на заедницата.
„Се разбира, за остварување на било која цел е потребна верба, посветеност и меѓусебна соработка, а, здружени можеме да направиме разлика“, рече претседателот.
Возобновувањето на „Клубот на одговорни бизниси“ на здружението „Конект“ се одржа под покровителство на претседателот, а како дел од проектот на УСАИД „Партнерства за донирање“.
На настанот се обратија и претставничката на канцеларијата на УСАИД во Северна Македонија, Џери Дајбл и извршната директорка на здружението „Конект“, Никица Кусиникова.
„И до сега сме имале повеќе успешни поединечни примери на учество во различни проекти, на бизнис заедницата, во партнерство со граѓанските организации и лидерите во локалните средини, со кои се придонесува за подобар квалитет на животот на граѓаните“, рече Пендаровски.
Токму во тоа и ја гледам додадената вредност на Клубот на одговорни бизниси, кому му посакувам успех во работата и реализација на зацртаните цели, за општото добро на сите нас.
