Еден од начините за финансирање е со кредитно задолжување, реагираат од Општина Карпош на прес-конференцијата на СДСМ на која обвинија дека Општината ќе се задолжи за нови 2,5 милиони евра.
– Кога станав градоначалник во 2009 година, Општина Карпош имаше два кредити од речиси еден милион евра, коишто ги зел мојот претходник, Андреј Петров. Граѓаните знаат дека, сепак, е стопати помалку направено во Општината во оној период додека беше градоначалник Петров (2005 – 2009 година), во однос на она што е изградено во периодот 2009 – 2013, односно 2014 година, додека јас ја менаџирам Општината. Не е воопшто чудно, ниту невообичаено една локална самоуправа, влада или претпријатие да се финансираат со кредити. Чудно е кога една партија се финансира преку кредитирање. Најчудно е што упатуваат критики токму членовите на СДСМ, а притоа СДСМ е единствена партија во Европа која се финасира по пат на задолжување. Да потсетам, Социјалдемократскиот сојуз има земено повеќе кредити и е задолжен со хипотека на целата зграда која ја има за да се финансира и да опстои како политичка партија – вели градоначалникот Јакимовски.
