Парламентарното мнозинство вечера не успеа да обезбеди 82 гласа за уставните амандмани, па по неколку долги паузи, претседателот на Собранието, Трајко Вељаноски, ја прекина седницата. Притоа не прецизираше кога таа ќе продолжи.
Извори од ВМРО-ДПМНЕ, утрово, како што објавивме, изјавија дека се чека Али Ахмети, лидерот на ДУИ. Ако тој е во состојба да дојде на седницата (завчера тој беше полесно повреден во сообраќајка ), уставните измени ќе бидат донесени, но доколку не се појави, седницата ќе се одложи за наредната недела.
Инаку, пратениците на ВМРО-ДПМНЕ, подржани од коалициските партнери, денеска на собраниската седница на која се расправаше за измените на Уставот, ги утврдија амандманите за дефицитот, јавниот долг и за судскиот совет.
За амандманот со кој се зголемува бројот на судиите во Советот, во кој нема да членуваат министерот за правда и претседателот на Советот, гласаше и пратеничката на Либералната партија, Роза Топузова-Каревска.
Пратениците го утврдија и амандманот за уставната тужба.
За расправата по текстот на амандманите се потребни мнозинство од вкупниот број на пратеници, додека, пак, за усвојувањето на уставните амандмани, потребно е двотретинско мнозинство, а исто толку и за изгласување на Уставниот закон.
