„Отпадот што нè окружува е наш производ. Ние луѓето сме го создале и сме го оставиле зад нас. Да покажеме совесност и одговорност за своето однесување кон природата, да се вклучиме во најголемата волонтерска акција „Генералка викенд“ и собирајќи го отпадот да и го вратиме сјајот на природата“, рече министерката за животна средина и просторни планирање, Каја Шукова од теренот на пролетната акција за чистење на депонијата кај Јажинце во општина Јегуновце.
„Генералка викенд“ е акција што Министерството ја поддржува од првата година, кога биле вклучени само 10 општини и 1.000 волонтери. Годинава, како што информираат од Министерството, бројот на општини е 53, а бројот на пријавени волонтери e повеќе од 16.000.
Оваа акција е најмасовна и најинклузивна акција за чистење на отпад на територијата на целата држава што се организира како соработка на повеќе приватни компании, државни институции, претставници на дипломатскиот кор, локални самоуправи, 400 училишта, локални поддржувачи и спортски клубови.
„Со засадување на дрвна садница за секои 10 килограми собран отпад, акцијата овозможува „засадување на отпадот во зелена иднина“ и претставува извонреден начин да се демонстрира моќта на заедништвото и координативата работа во интерес на животната средина и квалитетот на живото на сегашните и идните генерации“, се вели во соопштението на Министерството за животна средина.
