Министерот за здравство, Венко Филипче, во јавната дебата „Јавно приватно партнерство како модел на економски инвестиции” изјави дека физибилити студијата за јавно – приватно партнерство на Итна медицинска помош е завршена, пишува „Порталб.мк“.
„Имаме информација од економскиот опертор дека физибилити студијата е завршена и за периодот кој следи ќе биде доставена до Министерство за здравство“, изјави Филипче.
На прашањето на „Порталб.мк“, дали ќе има приватизација на Итната помош, Филипче одговори дека „терминот приватизација не треба да се користи, бидејќи не е приватизација”.
Во анализата на физибилити студијата ќе бидат вклучени синдикатот за здравство, невладиниот сектор и правни и економски експерти.
Експертот за јавно-приватно партнерство, Мирослав Трајановски, вели дека со јавно-приватно партнерство, државата ќе купува услуги за граѓаните.
-Во здравствениот систем приватниот сектор е вклучен, така е со примарното здравство бидејќи тоа функционари со јавно-приватно партнерство. Имаме матични лекари, кои веќе се приватници. Државата според капитациониот бод, број на пациенти ја купува услугата што ја даваат – вели Трајановски.
Но Филипче, спротивно од Трајановски истакна дека со јавното-приватно партнерство ќе се обезбедат финансии од приватниот партнер.
