Имам информации дека една докторка инфектолог веќе дала отказ на Клиниката за инфективни болести и планира да замине да работи во приватна болница. А исто така и докторка која што го раководеше инфективно одделение во болницата „8 Септември“, најави дека ќе си замине.
Ова денеска го истакна министерот за здравство Венко Филипче на прес-конференција по повод по повод одбележувањето на Европскиот ден на органодарителство – 10 Октомври.
Филипче додаде дека разговарал со шефицата на Одделот за инфективни болести во „8 Септември“, Патриција Каламарас но таа била решена да замине.
Причините што лекарите заминуваат, според Филипче е нивната премореност, а дел имале и лични причини.
Министерот за здравство не успеал да ги разубеди и трите сестри кои дадоа отказ на Инфективна клиника, и на нивно место други три сестри ги презеле функциите.
Филипче исто така рече дека се зголемува бројот на примени пациенти во болниците кој е поголем од оние кои се пуштаат дома.
„Навистина е голем бројот на новодијагностицирани во последните неколку денови, голем е бројот на пациенти кои доаѓаат за прием во болниците. Се пополнува капацитетот во сите инфективни оделенија, не така брзо во Скопје, меѓутоа насекаде во државата. Во текот на вчерашниот ден немаше слободни места во Куманово, во Струмица, во Велес и тие пациенти беа препраќани во Скопје. Пет пациенти се примени во „8 Септември“, 13 на Инфективната клиника. Таму има слободни уште десетина места и ја спремаме модуларната болница со цел да се намали притисокот кон болницата „8 Септември“ за да може другите пациенти да добиваат здравствена услуга. Може да се менаџираат болниците, имаме слободни кревети на Инфективната клиника, но целта е овој растечки тренд да го забавиме,“ рече Филипче.
