Новинарот на американскиот „Волстрит журнал“ Еван Гершковиќ денеска во Русија беше осуден на 16 години затвор за шпионажа кое се верува дека е политички мотивирано. Руското обвинителство побара тој да биде осуден на 18 години затвор.
Гершковиќ беше уапсен на 29 март 2023 година во Екатеринбург. Руските власти го обвинија, како што тврдат светските медиуми – без докази, дека собирал доверливи информации по налог на американската влада. Гершковиќ се изјасни за невин, а неговиот медиум и американската влада изјавија дека судењето е наместено.
За разлика од претходните судски рочишта, кога на новинарите им беше дозволено да се видат со Гершковиќ непосредно пред судењето, оваа недела на новинарите тоа им беше забрането.
Судските претставници рекоа дека обвинителот побарал осумнаесет години затвор за време во завршните зборови. Руските судови ги осудуваат речиси сите обвинети, а обвинителите можат да поднесат жалба доколку сметаат дека казните се благи.
„Неправилното апсење на Еван пред 477 дена е за згрозување и мора да заврши сега. Додека Русија го организира ова срамно и наместено судење, ние правиме сè што е во наша моќ Еван веднаш да биде ослободен. Тој ја вршеше својата новинарска работа, а новинарството не е криминал“, пишува Волстрит Журнал.
Американскиот Стејт департмент го прогласи апсењето на Гершкович за незаконско, обврзувајќи ја владата да бара негово ослободување.
Рускиот министер за надворешни работи, Сергеј Лавров, во средата во Обединетите нации изјави дека Москва и Вашингтон разговараат за размена на затвореници во која ќе биде вклучен и Гершкович. Русија претходно навести можност за размена.
Портпаролот на американското Министерство за надворешни работи вчера одби да зборува за можноста за размена, но рече дека ставот на САД од почетокот бил дека Гершковиќ е уапсен без докази и дека не направил ништо лошо.
Рускиот претседател Владимир Путин пред неколку месеци посочи дека е заинтересиран да го размени Гершковиќ со Вадим Красиков, руски државјанин кој отслужува доживотна казна затвор за убиство што го извршил во 2019 година.
