Порталот „А1он“, чии новинар и снимател вчера беа дивјачки претепани на протестот во Скопје што го организираше граѓанската иницијатива „За заедничка Македонија“, ќе го тужи организаторот и ќе бара надомест на штетата.
Министерот за внатрешни работи, Агим Нухиу, го информирал Здружението на новинари на Македонија дека приведени се лица за нападот на новинарската екипа на „А1он“. Министерот истакнал дека се работи на расчистување на случајот, но не открил колку лица се приведени и каде се пронајдени.
Петмина учесници на протестот, на крајот на собирот, ги нападнале снимателот Владимир Желчески и новинарот Александар Тодески додека професионално го следеле настанот. Напаѓачите ја скршиле камерата на „А1он“, а Желчески и Тодески, поради добиените повреди, со возило на брза помош беа пренесени во Ургентниот центар.
