Панел „Патот до Брисел преку Охрид“ по повод 17 години од Рамковниот договор


Скопје, 13 август, 2018 - 10:02 (META) 

Тематски панел „Патот до Брисел преку Охрид“ во рамки на одбележувањето 17 години од потпишувањето на Охридскиот рамковен договор ќе се одржи денеска во Клубот на пратеници во организација на Секретаријатот за европски прашања.

„Денес, Република Македонија е исправена пред еден од најважните предизвици во својата понова историја – да ја комплетира својата надворешна интеграција. Преку овој панел ќе се обидеме да создадеме врска меѓу Охрид, како симбол на внатрешната интеграција, и Брисел, кој ја симболизира нашата надворешна интеграција, т.е. нашата аспирација за полноправно членство во НАТО и Европската Унија“, се вели во најавата за настанот.

На панелот, како што е најавено, ќе се обратат претседателот на Владата на Република Македонија, Зоран Заев, претседателот на Демократската унија за интеграција, Али Ахмети, како и сер Барни Вајт Спунер, поранешен генерал на Британската армија и поранешен командант на НАТО во Република Македонија, за време на потпишувањето на Рамковниот договор.

Специјален гостин на панелот ќе биде и Евелин Фаркаш, поранешната заменичка на помошникот секретар за одбрана на САД, задолжена за Европа и Азија во администрацијата на Барак Обама, одговорна и за политика на САД кон Балканот.

На 13 август 2001 година беше потпишан Рамковниот договор со кој беше ставен крај на неколкумесечниот конфликт во Република Македонија. Документот по повеќедневно услогласување во Охрид, во Скопје во претседателската резиденција на Водно го потпишаа тогашниот претседател на државата Борис Трајковски, тогашниот премиер и лидер на ВМРО-ДПМНЕ Љубчо Георгиевски и лидерите на СДСМ Бранко Црвенковски, на ДПА Арбен Џафери и на ПДП Имер Имери.

Во својство на гаранти, документот кој е познат и како Охридски договор, го потпишаа и специјалните претставници на ЕУ и на САД Франсоа Леотар и Џејмс Пердју.


Османи: Преговорите со ЕУ ќе бидат тежок, долготраен и скап процес


Скопје, 1 август, 2018 - 14:33 (META) 

Вицепремиерот за европски прашања Бујар Османи и посебниот советник на претседателот на Владата за евроатлантски интеграции, Бојан Маричиќ денеска на прес-конференција во владата ја презентираа преговарачката структура за пристапување на Македонија во Европската Унија за која рекоа дека е процес кој ќе биде тежок, долготраен, макотрпен, скап и каде што ќе има многу тешки политички одлуки.

Османи рече дека основната функција на процесот на преговори е нашата подготовка за членство и дека трансформацијата треба да резултира со создавање европско општество.

Според моделот кој бил одлучен на вчерашната седница на Влада, ќе има Координативно тело за процесот на пристапување, кое ќе ги утврдува преговарачките позиции на РМ во преговорите. Во него ќе учествуваат примерот, неговите заменици, шефот на дипломатијата, министрите за финансии, економија, правда и информатичко општество.

Османи, како политички преговарач ќе ја предводи државната делегација за пристапни преговори со ЕУ со улога да ги води преговорите и да обезбеди непречено одвивање на процесот по сите поглавја. Заменик на Османи ќе му биде шефот на дипломатијата Никола Димитров, во неа учествува главниот технички преговарач, шефот на мисијата на РМ во ЕУ и секретарот на преговарачката група.

Преговарачка група е третата структура. Таа е задолжена за техничкото ниво на преговорите со ЕК за сите поглавја, а ќе ја предводи главниот технички преговарач, Маричиќ.

Османи појасни дека СЕП ќе биде и Секретаријат на преговарачката група, а ќе биде назначен и секретар на преговарачката група.

-Државните и јавни институции ќе бидат локомотивата на овој процес, а Собранието, судството, опозицијата, граѓанското општество и сите други засегнати страни ќе мораат да бидат вклучени – рече Маричиќ.

Вицепремиерот Османи појасни дека до октомври, СЕП ќе направи мапирање на институциите, на групите на интереси како и конкретните имиња кои ќе дадат придонес на овој процес.

-Ова ќе биде комплексна операција и многу скапа. Се прават пресметки колку ќе чини, министерството за финансии треба да се прилагоди на потребите на овој процес. Владата ќе го финансира овој процес од буџетот бидејќи е една од најважните стратешки цели на државата, а финансиска помош ќе имаме и од ЕУ преку ИПА фондовите бидејќи буџетот не е доволен да ја покрие оваа интензивна агенда – појасни Османи.

Маричиќ вели дека во процесот ќе бидат вклучени повеќе стотици луѓе, а до крајот на процесот таа бројка може да достигне и до илјада луѓе.


Османи, Спасовски, Саљији и Манчевски ќе му реферираат на Хан за „3-6-9“


Скопје, 19 ноември, 2017 - 16:10 (META) 

Вицепремиерот за европски прашања, Бујар Османи, заедно со вицепремиерот и министер за внатрешни работи, Оливер Спасовски, министерот за правда, Билен Саљији, како и со министерот за информатичко општество и администрација, Дамјан Манчевски, утре во Секретаријатот за европски прашања ќе има средба со еврокомесарот за проширување и за соседска политика, Јоханес Хан.

Од СЕП информираат дека Османи ќе ги презентира новите реформски пакети „6-9“, кои претставуваат дополнување на планот „3-6-9“.

Спасовски, Саљији и Манчевски ќе го информираат Хан за реформските приоритети во правосудството, реформата на безбедносните служби, како и за реформите во јавната администрација.


Османи: Локалните избори се круна на планот „3-6-9“ и тест за Владата


Скопје, 28 јули, 2017 - 14:16 (META) 

Парламентарните избори минатата година го означија почетокот на крајот на една тешка институционална и политичка криза, но означија и почеток на деблокирање на евроинтегративниот процес, изјави вицепремиерот Бујар Османи, пред почетокот на tрибината посветена на имплементацијата на мерките од планот „3-6-9“ што се однесуваат на изборите и на изборниот процес.

– Иако тие избори означија некаков почеток, сметам дека следните локалните избори ќе означуваат крај на првата фаза, која ќе даде оценка дали навистина сме се вратиле на евроинтегративниот процес, односно на демократскиот пат – рече Османи, додавајќи дека локалните избори се круна на планот „3-6-9“ бидејќи изборите се показател за состојбата во администрацијата, медиумите и кај граѓаните.

Османи истакна дека мерките што ќе се спроведуваат треба да обезбедат мирни, фер и демократски избори, што е важна одредница за оценката што ќе ја дадат меѓународните партнери. Тој нагласи дека особено е важно следните избори да немаат ниту една дамка.

– Особено е важно да се издвои процесот на евроинтеграциите од дневната политика, да се издвои на наднационално, надрапартиско и надетничко ниво. Оттука уште еднаш ја повикувам опозицијата да биде дел од тој процес за да чекориме напред кон ЕУ – рече Османи.

Министерот за внатрешни работи, Оливер Спасовски, изјави дека МВР како поддршка на Државната изборна комисија постојано работи на подобрување и на подигнување на веродостојноста на избирачкиот список и на враќање на довербата кај граѓаните.

Претседателот на ДИК, Александар Чичаковски, рече дека подготовката за локалните избори почнала веднаш по завршувањето на предвремените парламентарните избори преку внатрешна евалуација за спроведување на предвремените избори, стратешко планирање за подготвување план за периодот до 2020 година и анализа на финалниот извештај на ОБСЕ/ОДИХР и на домашните набљудувачи.

– Анализите покажаа дека клучни приоритети треба да бидат подобрување на внатрешната организација, ефикасноста и транспарентноста во работењето на ДИК, спречување на сите можности за донесување политички одлуки, како во рамки на Комисијата, така и во рамки на општинските изборни комисии и избирачките одбори – рече Чичаковски, додавајќи дека е потребно да се донесат дополнителни прописи за регулирање на изборните процедури и за унапредување на едукацијата на општинските комисии и одбори.

Тој истакна дека клучна активност на ДИК била ажурирањето на избирачкиот список и дека од голема помош им било организирањето на неколкуте локални референдуми, бидејќи со тоа дале дополнителна динамиката на процесот на ажурирање на избирачкиот список.

Чичаковски на крај истакна дека ДИК привршува со активностите и со мерките што беа планирани за подготовката на локалните избори и дека подготвени го очекуваат распишувањето на локалните избори.


Политичката состојба во Македонија е како изгребана плоча, оцени Тимоние


Битола, 30 март, 2017 - 13:14 (META) 

Политичката состојба во Македонија во моментов наликува на изгребана плоча и не сакам да додадам уште една гребнатина на тоа што веќе е, изјави денеска во Битола францускиот амбасадор Кристијан Тимоние, каде учествуваше на форумот „Европските перспективи за локалната самоуправа“.

– Посакувам што побргу да се излезе од оваа состојба затоа што македонскиот граѓанин сака да види излез од оваа ситуација бидејќи светот не чека – рече Тимоние, одговарајќи на новинарско прашање.

Тимоние рече дека француската амбасада тесно соработува со Секретаријатот за европски прашања и дека Франција назначила технички експерт кој во рамките на СЕП помага како да се постигне поголема искористеност и пристап до ЕУ-фондовите.

– Но, за тоа е потребна влада што ќе ја спроведува потребната динамика, а административната празнина што постои во моментов, не ни помага во работата – истакна Тимоние.


Се одржа 13. Комитет за стабилизација и асоцијација


Скопје, 15 јуни, 2016 - 14:20 (META) 

Тринаесеттиот Комитетот за стабилизација и асоцијација помеѓу Република Македонија и Европска Унија се одржа денеска во Скопје, а во неговиот фокус беше степенот на исполнување на политичките и на економските критериуми.

„Комитетот за стабилизација и асоцијација се осврна на степенот на исполнување на политичките и економските критериуми во изминатиот период, како и на степенот на имплементација на Договорот за стабилизација и асоцијација. Претставниците на Република Македонија ја потврдија посветеноста на процесот на европска интеграција како клучен стратешки приоритет на земјата и се заложија да покажат конкретен напредок во спроведувањето на обврските од ЕУ-агендата, особено во областите на итните реформски приоритети. Во овој контекст, за време на состанокот се направи краток осврт на клучните настани и планирани активности во однос на политичките и на економските критериуми“, информираат од СЕП.

Резултатите од одржаниот состанок на Комитетот ќе бидат презентирани во рамките на Советот за стабилизација и асоцијација, кој ќе се одржи во јули 2016 година.

На Комитетот претставник на Секретаријатот за европски прашања била Ана Блажевски, државен секретар во СЕП, a Дејвид Кулен, раководител на одделение за Република Македонија во Директорат за проширување и соседска политика, претседаваше од страната на Европската комисија.


Вицепремиерот Бесими и амбасадорката Оер потпишаа писмо за соработка


Скопје, 26 февруари, 2016 - 14:13 (META) 

Заменик претседателот на Владата, Фатмир Бесими, и амбасадорката на Франција во земјава, Лоренс Оер, потпишаа писмо за зајакнување на техничката соработка помеѓу двете земји.

„Оваа соработка ги опфаќа присуството на францускиот експерт за европски прашања, Бертранд Милет, во Секретаријатот за европски прашања и билатералната поддршка во понатамошното усогласување на националното законодавство со законодавството на Унијата, јакнење на институционалните капацитети, вклучувајќи ги ресорните министерства и управувањето на националните и регионалните ИПА-фондови, со фокус на проектите за видливост, инфраструктура и за интерконективност за целиот регион на Западен Балкан“, се вели во соопштението од кабинетот на вицепремиерот.


Регионална конференција „Пристапни реформи во Западен Балкан“


Скопје, 27 ноември, 2015 - 10:31 (META) 

Денеска во Скопје ќе се оддржи регионална конференција на тема „Пристапни реформи во Западен Балкан“, во организација на Секретаријатот за европски прашања.

Како што соопшти СЕП, воведни излагања на форумот ќе имаат македонскиот вицепремиер задолжен за евроинтеграции, Фатмир Бесими, шефот на Делегацијата на ЕУ во Македонија, амбасадорот Аиво Орав и германскиот заменик-амбасадор Ханс-Хелге Сандер.

На конференцијата ќе учествуваат и заменик-министерот за евоинтеграции на Албанија, Гентијан Елези, Дарија Рамљак, помошник-директор во дирекцијата за евроинтеграција на Босна и Херцеговина, заменик-министерот за евроинтеграции на Косово, Рамадан Илази, в.д. директорот на владината Канцеларија за евроинтеграции на Србија, Ксенија Миленковиќ, и Александар Пејовиќ, државен секретар за евроинтеграции на Црна Гора.

Предвидено е да се одржат две панел-дискусии пред кои куси воведни излагања ќе одржи Лоренс Мередит, шеф на одделот за стратегија и политики при Генералниот директорат за соседство и за преговори за проширување на Европската комисија. Дискусиите се на тема „Новата стартегија за проширување и новата генерација извештаи“ и „Редефинирана методологија: позитивни аспекти и предизвици во известувањето“.

Форумот се организира во соработка со Германското друштво за интернационалнa соработка ГИЗ, во рамките на Отворениот регионален фонд за поддршка на ЕУ интеграции, финансиран од Сојузното министерство за економски развој и за соработка.


Бесими се сретна со регионалниот директор на УНИЦЕФ


Скопје, 26 октомври, 2015 - 20:11 (META) 

Вицепремиерот задолжен за европски прашања, Фатмир Бесими, се сретна со Мари Пјер Поарие, регионален директор на УНИЦЕФ за Источна и за Централна Европа и за Заедницата на Независни Држави, со која разговарал за мерките и за активностите што се преземаат во Македонија, во насока на справување со бегалската и мигранската криза.

„Вицепремиерот Бесими за време на разговорот истакна дека Македонија прави сè што е во нејзините можности и надлежности за соодветно справување со состојбата, пред сè, заштита на животот и на здравјето на мигрантите, заштита на националната и јавната безбедност и заштита на јавното здравје, а особено во насока на сузбивање на илегалниот транспорт на мигранти и на трговијата со луѓе. Меѓу другото, тој истакна дека на Македонија ѝ е неопходна и понатамошна помош од Европската унија и од билатералните партнери, во насока на што Секретаријатот за европски прашања организира донаторски состаноци со меѓународната заедница“, се вели во соопштението од СЕП.

Двајцата соговорници за време на разговорот ги поздравиле заклучоците од мини-самитот и се согласиле дека само со колективен прекуграничен пристап, базиран на солидарност, одговорност и на прагматична соработка меѓу националните, регионалните и локалните власти може да се постигне успех во справувањето со предизвикот.


Договорот од Пржино, клучен за почеток на претпристапните преговори со ЕУ


Скопје, 14 септември, 2015 - 19:30 (META) 

Неизвесно е дали претпристапните преговори на високо ниво со Евроспката унија ќе се најдат на агендата на еврокомесарот за проширување и за соседска политика, Јоханес Хан, кој в петок ќе допатува во Скопје, дознава „Мета“ од високи извори во Секретаријатот за европски прашања (СЕП).

– Исклучително е важно имплементирањето на политичкиот договор. Во јавноста се појавија гласини дека нереализирањето на договорот може да придонесе за симнување на пленарната седница за ХЛАД од агендата на Хан. Отворено е прашањето дали се размислува во таа насока. Не можам ниту да потврдам, ниту да негирам дали е тоа така. СЕП се подготвува како да ќе има средба за ХЛАД – вели истиот извор.

Од СЕП не сакаат да коментираат дали имплементирањето на Договорот од Пржино може да придонесе за да не се добие препорака за почеток на преговорите. Според нив, таквото сценарио би значело дека Македонија се враќа наназад според Копенхашките критериуми.

Следната недела во Брисел на македонските власти ќе им биде презентиран нацрт-извештајот во кој ќе бидат истакнати напредокот, но и забелешките за Македонија од Европската комисија. Сепак, имплементирањето на политичкиот договор останува клучно за извештајот.