Нимиц денеска на средби во Атина, ОН сметаат на можно решение на проблемот со името


Атина, 30 јануари, 2018 - 9:53 (META) 

Обединетите нации (ОН) сметаат дека може да биде постигнат напредок во решавањето на 25-годишниот спор помеѓу Грција и Македонија за името, ако има компромис кај раководствaта и народите на двете земји, изјави заменик-портпаролот на ОН, Фархан Хак.

Хак додал дека ОН целосно ја дели оценката на медијаторот дека е создаден позитивен импулс во релациите меѓу двете земји и оти е можно решение на проблемот со името.

Инаку, специјалниот претставник на ОН во разговорите помеѓу Македонија и Грција, Метју Нимиц денеска во Атина ќе има средби со шефот на грчката дипломатија Никос Коѕиас и со одговорниот за надворешна политика во опозициската Нова демократија, Јоргос Кумуцакос.

По посетата на Атина, Нимиц утре и задутре доаѓа во Македонија на средби со државниот врв.


Почна координативниот состанок на државниот врв за предлозите на Нимиц


Скопје, 27 јануари, 2018 - 18:52 (META) 

Почна координативниот состанок на државниот врв на кој ќе се разгледува иницијалната рамка за решавање на спорот за името, која ја предложи медијаторот Метју Нимиц.

Во Клубот на пратеници пристигнаа претседателот Ѓорге Иванов, со двајца претставници на неговиот кабинет, премиерот Зоран Заев заедно со министрите за одбрана и за надворешни работи, Радмила Шекеринска и Никола Димитров, лидерот на ВМРО-ДПМНЕ, Христијан Мицкоски на состанокот е придружуван од Владо Мисајловски и Александар Николовски, а лидерот на ДУИ, Али Ахмети дојде со потпретседателите во Владата, Бујар Османи и Хазби Лика.

Од МНР вчера соопштија дека по завршувањето на средбата не е предвидена прес-конференција и изјави за медиумите.


Државниот врв денеска на координативен состанок за предлозите на Нимиц


Скопје, 27 јануари, 2018 - 10:00 (META) 

Државниот врв денеска на координативен состанок ќе ја разгледува иницијалната рамка за решавање на спорот за името, која ја предложи медијаторот Метју Нимиц.

Состанокот, кој вчера и официјално беше најавен од Министерството за надворешни работи, ќе се одржи во 18 часот, во Клубот на пратениците.

На состанокот ќе учествуваат претседателот на државата Ѓорѓе Иванов, премиерот Зоран Заев, министерот за надворешни работи, Никола Димитров, претседателот на ВМРО-ДПМНЕ, Христијан Мицкоски и претседателот на ДУИ, Али Ахмети.

Од МНР соопштија дека по завршувањето на средбата не е предвидена прес-конференција и изјави за медиумите.

Посредникот на ОН во разговорите за името, Нимиц, на 17 јануари по средбата со македонскиот и со грчкиот преговарач, Васко Наумовски и Адамантиос Василакис, во седиштетот на ОН изјави дека има големи надежи дека овој процес се движи во позитивна насока и дека на повидок е решение на спорот за името.

Нимиц на покана на владите на Македонија и на Грција ќе престојува во Атина и во Скопје во периодот од 29 јануари до 1 февруари.

Тој на 31 јануари ќе пристигне во Скопје, а следниот ден ќе има средби со државниот врв.


Државниот врв им го честиташе Богојавление – Водици на православните верници


Скопје, 19 јануари, 2018 - 10:31 (META) 

Премиерот Зоран Заев, по повод празникот Богојавление – Водици упати честитка до поглаварот на Македонската православна црква – Охридска архиепископија, г.г. Стефан и до сите православни верници.

„Благородната порака на овој празник исполнува и со оптимизам, и дека надежта и жедта за доброто, совршеното и убавото никогаш не згаснува. Со овие пораки, и со искрената верба во нив, да си посакаме подобра иднина, здравје, и со добра волја да се соочуваме со сите предизвици што ни претстојат на личен и на колективен план“, напиша Заев во честитката.

Претседателот на Собранието, Талат Џафери од свое лично име и од име на пратениците на сите верници од христијанска вероисповед им го честиташе Богојавление – Водици, со порака дека овој празник, како и сите други празници, се моменти во кои се сплотуваат луѓето и споделуваат добри мисли, взаемна почит, разбирање и љубов.

„Нека вашите срца и вашите домови бидат исполнети со духовен мир, семејна топлина и убави желби за напредок во секоја димензија. Нека е честит и за многу години празникот“, стои во честитката од Џафери.

Претходно, претседателот на државата во честитката по повод празникот наведе дека Богојавление – Водици „треба да нè потсетува да не се навраќаме на старото, туку да се стремиме кон живот исполнет со љубов, понизност, милост и солидарност“.

„Да се престигнуваме со добрина, и да го градиме нашето мултиетничко, мултирелигиско и мултијазично општество во мир, соживот и почитување на различноста“, порача Иванов.


Иванов денеска во работна посета на Унгарија


Будимпешта, 20 март, 2017 - 9:52 (META) 

Претседателот на државата, Ѓорге Иванов, денеска ќе престојува во работна посета на Унгарија, соопштија утринава од неговиот кабинет.

„Претседателот Иванов во Будимпешта ќе се сретне со претседателот на Унгарија, Јанош Адер, со премиерот на Унгарија, Виктор Орбан, и со претседателот на парламентот на Унгарија, Ласло Ковер“, стои во соопштението.

Иванов минатата недела беше во дводневна посета на Азербејџан, каде учествуваше на Форумот во Баку, а во меѓувреме ја одложи посета на Австралија, планирана за крајот на оваа недела, поради актуелната политичка состојба во земјава.

Утре во Македонија, како што е највено, треба да пристигне еврокомесарот за проширување и за добрососедска политика, Јоханес Хан, заедно со тројцата европратеници, Иво Вајгл, Едвард Кукан и Кнут Флекенштајн, во рамките на напорите за наоѓање излез од актуелната политичка криза околу формирањето на новата влада. Тие, меѓу другото, се очекува да имаат средба и со претседателот на државата, Иванов.


Ахмети по средбата со Рама: Рано е да се зборува за нова коалиција со Груевски


Тирана, 16 декември, 2016 - 18:16 (META) 

Лидерот на ДУИ, Али Ахмети, при вчерашната посета на Тирана имал средби со премиерот на Албанија, Еди Рама, со спикерот на албанскиот парламент, Илир Мета, и со претседателот на државата Бујар Нишани, јавува дописникот на „Мета“ од Тирана.

„Охридскиот договор, членството на Македонија во НАТО и во Европската Унија, економскиот развој и еднаквоста меѓу етничките заедници ќе бидат принципите врз основа на кои ние ќе се водиме во преговорите во иднина – изјави Ахмети за медиумите по средбите со албанскиот државен врв.

Тој додаде дека сè уште е рано да се зборува за нова коалиција со лидерот на ВМРО-ДПМНЕ, Никола Груевски.

Претходно неделава, веднаш по парламентатните избори во неделата, на средби со премиерот Еди Рама беа лидерите на Беса, Алијанса за Албанците и на ДПА, Билал Касами, Зијадин Села и Мендух Тачи.

Во медиумите два дена кружеа информации дека Ахмети ја откажал средбата со Рама, но тој вчера сепак допатува во Тирана на средби со државниот врв на Албанија.


Грчките медиуми ја поздравуваат посетата на Коѕиас на Македонија


Атина, 24 август, 2016 - 11:50 (META) 

Посетата на министерот за надворешни работи на Грција, Никос Коѕиас, на Македонија, како и таа на солунскиот градоначалник Јанис Бутарис, во Грција се оценети позитивно, како чекор напред во билатералните односи меѓу двете земји.

Грчкиот весник „Катимерини“ коментира дека средбите меѓу двете страни покажуваат одново воспоставување на постојан канал на комуникација меѓу двете земји, обид за воспоставување клима на доверба, која би можела да помогне за идни иницијативи за решавање на спорот за името.

„Иако причините за патувањата на градоначалникот и на министерот за надворешни се различни, очекувањата се исти: воспоставување постојан канал на комуникација на ниво на високи функционери во период на политичка нестабилност во БЈРМ и култивирање на атмосфера на пријателство и на добрососедство меѓу двете општества“, пишува „Катимерини“.

Според весникот, покрај добрите врски меѓу Коѕиас и Попоски, силна врска и интензивна комуникација се создава и меѓу претседателот Иванов и Бутарис. Покрај нивната комуникација за помошта за поплавите, двете страни биле во комуникација и за потенцијална посета на Иванов на Солун.

Грчкиот министер за надворешни работи, Никос Коѕиас, ќе се сретне со целиот македонски државен врв, утре во Скопје.

Коѕиас доаѓа во Скопје на покана на Попоски како гостин-говорник на работниот состаник на Амбасадорскиот совет на дипломатско-конзуларните претставништва на Македонија. Коѕиас, кому ова е втора посета за една година, ќе има средби и со премиерот Емил Димитриев и со претседателот Ѓорге Иванов.


Државниот врв денеска на традиционален божиќен ручек кај г.г. Стефан


Скопје, 9 јануари, 2016 - 9:59 (META) 

Поглаварот на Македонската православна црква – Охридска архиепископија (МПЦ – ОА), г.г. Стефан, по повод празнувањето на архиѓаконот и првомаченик Свети Стефан и трет ден Божиќ, денеска ќе приреди традиционален божиќен ручек за државниот врв.

Како што е најавено, на божиќниот ручек ќе присуствуваат претседателот на Република Македонија, Ѓорге Иванов, претседателот на Собранието, Трајко Вељаноски, и премиерот Никола Груевски.