Иако изложувањето на сонце има значителни здравствени придобивки, за жал, со климатските промени, топлотните бранови се сѐ почеста појава и се подолги и потопли, а ризикот на човековото здравје рамномерно се зголемува, велат од Институтот за јавно здравје, давајќи препораки како луѓето да се разладат на екстремна топлина.
Избегнување на изложување на сонце
„Најважниот чекор е да се држите подалеку од сонце со престој во затворен простор или во засенчена област во најжешките часови од денот-помеѓу 10 и 17 часот“.
Соодветен третман при изложување на сонце
„Кога сте на директна сончева светлина, по ваша проценка, покријте го видливиот дел на телото носејќи светла и широка облека и очила со УВ заштитен фактор. Редовно нанесувајте крем за сончање со минимум фактор на заштита 30 (по потреба консултирајте се со Вашиот лекар или фармацевт). При нанесување на крем за сончање, покрај нанесување на лицето, не ги запоставувајте и други откриени делови на телото, деколтето, ушите и вратот“.
Изберете поладна и пократка рута до крајната дестинација
Од ИЈЗ понатаму препорачуваат да се покрие главата со капа која ќе овозможи комплетна засенченост на ушите, носот и вратот или да се користи чадор со бела боја. Исто, лепезата може да биде добра алатка во справување со топлината.
„Не заборавајте да правите редовни паузи во затворени простории или во засенчени места за да избегнете топлотна исцрпеност или топлотен удар. Можете да понесете со себе спреј со вода или шише со вода и повремено да прскате или мануелно (рачно) да нанесете. Алтернативно, ставете ладни облоги. Измијте ги рацете, вратот и нозете. Изложувањето на вода на овие регии ќе придонесе за брзо и ефикасно ладење“, препорачува ИЈЗ.
